Қозоғистон соғлиқни сақлаш вазири Елжан Биртанов эгаллаб турган лавозимидан озод қилинди. Унинг ўрнига вазирнинг биринчи ўринбосари сифатида ишлаб келган Алексей Цой тайинланди. Бу ҳақда Қозоғистон президентининг матбуот хизмати хабар берди.
«Давлат раҳбарининг фармони билан Биртанов Елжан Амантаевич Қозоғистон Республикаси соғлиқни сақлаш вазири лавозимидан озод этилсин», – дейилган Қосим-Жўмарт Тўқаев матбуот хизматининг хабарида.
Шунингдек, Оқўрда бир неча кун аввал соғлиқни сақлаш вазирининг биринчи ўринбосари лавозимини эгаллаган Алексей Цой идорага янги раҳбар этиб тайинлангани маълум қилинган.
Аввалроқ Қозоғистон парламенти Алексей Цойни соғлиқни сақлаш вазири лавозимига тайинлаш ҳақидаги таклифни маъқуллаганди.
Янги вазир 43 ёшда, у учта тилда эркин сўзлаша олади. Юридик ҳамда тиббиёт йўналиши бўйича олий маълумотга эга, тиббиёт фанлари номзоди.
Эслатиб ўтамиз, 14 июнда Қозоғистон соғлиқни сақлаш вазири Елжан Биртановда коронавирус аниқлангани хабар қилинган, кейинчалик 18 июнда Қозоғистоннинг биринчи президенти Нурсултон Назарбоевнинг коронавирусга чалингани маълум бўлди. У касаллик туфайли Москва шаҳрида ўтказилган Ғалаба парадида иштирок эта олмади.
Шунингдек, 20 июнда Қирғизистонда Бишкек мэри Азиз Суракматов, 22 июнда Олмаота вилояти ҳокими Омондиқ Баталовнинг касалликни юқтириб олгани ҳақида хабарлар берилган.
Изоҳ (0)