Сирдарё вилояти Гулистон шаҳрида нодавлат таълим муассасаси биносида ёнғин содир бўлди. Бу ҳақда Фавқулодда вазиятлар вазирлиги хабар қилган.
Хабарга кўра 25 июнь куни соат 14:07 да Сирдарё вилояти Фавқулодда вазиятлар бошқармасига Гулистон шаҳри «Намуна» маҳалласи Сайҳун кўчасида жойлашган Идеал Студй нодавлат таълим муассасасида ёнғин келиб чиққани тўғрисида хабар берилган.
Фавқулодда вазиятлар бошқармасининг ёнғин-қутқарувчилари зудлик билан воқеа жойига етиб борган. Олиб борилган чоралар натижасида бинода қолиб кетган 111 нафар ўқувчи ҳамда ўқитувчилар хавфсиз ҳудудга эвакуация қилинган.
Шунингдек, қутқарувчиларнинг саъй-ҳаракатлари туфайли бинонинг 1600 метр квадрат майдони ёнғиндан асраб қолинган.
Эслатиб ўтамиз, Сирдарё вилояти, жумладан, Гулистон шаҳри 2020 йил 20 июнь ҳолатига кўра, «яшил» ҳудуд ҳисобланади. Вилоятда фақат Ховос тумани «қизил» тоифага ажратилган.Аввалроқ Тошкент вилоятининг Янгийўл шаҳрида қоғоз заводи ёниб кетгани, 5000 квадрат метр майдон ўт қуршовида қолгани ҳақида хабар қилинганди.
Изоҳ (0)