«Туризм соҳасини санитария-эпидемиологик хавфсизликнинг кучайтирилган режими талабларига қатъий риоя қилган ҳолда ривожлантиришга доир қўшимча чора-тадбирлар тўғрисида»ги Президент қарорига мувофиқ, 2021 йил 1 январдан 2023 йил 31 декабрга қадар меҳмонхонага белгиланган тартибда берилган тоифа сақланган тақдирда тегишли йил якунига кўра жойлаштириш воситасининг тоифаси учун ундирилган туристик (меҳмонхона) йиғим суммасининг 50 фоизи жойлаштириш воситаларига қайтарилади. Бу ҳақда Тошкент шаҳар туризмни ривожлантириш департаменти матбуот хизмати хабар қилди.
Қарорга кўра 2020 йил 1 августдан бошлаб инвесторларнинг йўловчи ташувчи янги дор йўлларини («Чорвоқ» эркин туристик зонаси ҳудудида ташкил этилаётганлардан ташқари) қуриш ва жиҳозлаш учун йўналтирилган харажатларининг бир қисми ҳар 500 метр йўл учун Давлат бюджетидан Туризм соҳасини қўллаб-қувватлаш жамғармасига ажратиладиган маблағлар ҳисобидан 1 миллиард сўм миқдорида қопланади. Бунда дастлабки 50 та лойиҳага йўналтирилган инвесторлар харажатларининг бир қисми қопланади.
Шунингдек, қарорда шаҳарлар ва туманлар бош режаларини ишлаб чиқиш ва тасдиқлаш жараёнида улар туризм инфратузилмасини ривожлантириш қисмида Туризмни ривожлантириш давлат қўмитаси билан мажбурий келишилиши белгиланган.
Гид (гид-таржимон), экскурсия етакчиси ва йўриқчи-йўл бошловчиларнинг хизматлари ўзини ўзи банд қиладиган шахслар шуғулланиши мумкин бўлган фаолият (хизматлар, ишлар) турлари рўйхатига киритилади.
2020 йил 1 июлдан 2023 йил 1 июлга қадар нодавлат (хусусий) музейлар, бадиий галереялар ва ҳунармандчилик марказларининг асосий фаолият тури бўйича фойда солиғи, мол-мулк ва ер солиқлари ҳамда айланмадан олинадиган солиқ ставкалари белгиланган миқдорга нисбатан 50 фоизга камайтирилади.
Аввал Ўзбекистонда коронавирусга чалинган туристларга 3 минг доллар миқдорида компенсация тўланиши, янги имиграцион виза тури жорий қилиниши, вилоятлар ҳокимларига туризм ва спорт масаласи бўйича ўринбосар ва маслаҳатчи лавозими жорий этилиши, Бухоро, Навоий ва Сурхондарё вилоятларидаги туроператорларга автомобиллар импорти учун имтиёз берилгани хабар қилинганди.
Изоҳ (0)