Туризмни ривожлантириш давлат қўмитаси раиси Азиз Абдуҳакимов қадимий Ипак йўли бўйлаб замонавий карвонсаройлар қуришни таклиф қилди

Ўзбекистон Республикаси бош вазир ўринбосари — Туризмни ривожлантириш давлат қўмитаси раиси Азиз Абдуҳакимов 23 июнь куни видеоконференция шаклида ўтган Туркий тилли давлатлар ҳамкорлик кенгаши (ТТДҲК) туризм вазирларининг V йиғилишида иштирок этди ва унда бир нечта ташаббусни илгари сурди. Бу ҳақда Туризмни ривожлантириш давлат қўмитаси ахборот хизмати хабар қилган.

Туризм вазирларининг онлайн учрашувида ТТДҲК бош котиби Багдад Амреев, Туркия маданият ва туризм вазири Меҳмет Эрсой, Озарбайжон туризм агентлиги раиси Фуат Нагиев ҳамда ТТДҲК мамлакатларининг туризм ташкилотлари раҳбарлари қатнашган.

Тадбирда Азиз Абдуҳакимов Туркистондаги Аҳмад Яссавий мақбараси, Тошкент вилоятидаги Зангиота ва Қўнғирот туманидаги Ҳаким ота Боқирғоний зиёратгоҳларини ўз ичига олган «Олтин учбурчак» турини фаоллаштиришни таклиф этди. Бундан ташқари, чегараолди ҳудудларида оффшорлар туристик кластерларини ташкил қилиш, унда савдо-сотиқ ва бошқа алоҳида солиқ шарт-шароитларини яратиш кўзда тутилганини таъкидлади.

«Биз туркий тилли давлатлар маданияти ва анъаналарини намойиш этувчи турли фестивалларни ташкил қилиш ҳамда уларнинг ўтказилишини иштирокчи мамлакатларнинг маданий тадбирлар ягона тақвимини шакллантириш орқали биргаликда тарғиб қилишни таклиф этамиз»,– деган Абдуҳакимов.

У йиғилиш иштирокчиларига сўнгги йилларда Ўзбекистонда ўтказилаётган «Мақом», «Бахши», Халқ амалий санъати фестивали каби йирик маданий-оммавий фестиваллар ҳақида ҳам маълумот берган.

Онлайн конференция давомида бош вазир ўринбосари Туркий тилли давлатлар ҳамкорлик кенгашига аъзо мамлакатларнинг тарихий ва туристик шаҳарлари ўртасида авиарейслар сони ва йўналишларини ошириш, уларнинг географиясини кенгайтиришни ҳам таклиф қилган. Хусусан, Туркия, Озарбайжон, Венгрия ва бошқа иштирокчи мамлакатларнинг тарихий ва туристик шаҳарлари ўртасида транспорт алоқаларининг янги йўналишлари ушбу давлатлар иқтисодиётига ижобий таъсир қилиши, бундан ташқари, сайёҳларга қулайлик яратиш мақсадида қадимий Ипак йўли бўйлаб замонавий карвонсаройлар қуриш лозимлигини қайд этди.