Тошкент вилоятида Кучлик–Тўйтепа темир йўл бекатларининг 38—39-километрлари оралиғида юк вагонидан тахта ўғирлаётган икки нафар шахс қўлга олинган. Бу ҳақда Ички ишлар вазирлиги ахборот хизмати хабар қилди.
Вазирлик хабарига кўра, 23 июнь куни соат 04:00да «Кучлик» темир йўл бекатида хавфсизликни таъминлаш бўлимига ҳарбийлаштирилган қўриқлаш бўлими қўриқчиси телефон орқали юк вагонидаги тахта маҳсулотлари номаълум шахслар томонидан туширилаётганлиги ҳақида хабар берган.
Олиб борилган тадбирда Чуқурсой—Поп йўналишидаги юк поездининг вагонларидан пўлат маҳсулотларини ушлаб туриши учун қотирилган тахталарни Тошкент вилоятида яшовчи 34 ёшли Б.Б. ва вояга етмаган 10-синф ўқувчиси О.О. тушираётгани маълум бўлган. Икковлон жами 32 дона тахтани вагондан туширишга улгурган.
Мазкур ҳолат юзасидан суриштирув ишлари олиб борилиб ва етказилган зарар миқдори аниқланмоқда. Суриштирув «Кучлик» темир йўл бекатида хавфсизликни таъминлаш бўлими томонидан олиб борилмоқда.
Изоҳ (0)