Тошкент шаҳри ва Тошкент вилоятида яширинча равишда фаолият юритиб келган «Тавҳид ва жиҳод катибаси» (ТЖК) халқаро террорчилик ташкилоти тарафдорлари 23 июнь куни аниқланиб, қўлга олинди. ИИВ хабарига кўра, гумон қилинувчиларни қўлга олиш бўйича тезкор тадбир ИИВ, ДХХ, Тошкент шаҳар ДХХБ ва ИИББ томонидан амалга оширилган.
Жиноят кодекси 244-2-моддаси 1-қисмига (диний экстремистик, сепаратистик, фундаменталистик ёки бошқа тақиқланган ташкилотларни тузиш, раҳбарлик қилиш, уларда иштирок этиш) асосан қўзғатилган жиноят иши доирасида Тошкент шаҳрининг Олмазор, Учтепа, Чилонзор, Яккасарой ва Сирғали ҳамда Тошкент вилоятининг Зангиота туманидаги жами 25 та манзилда тинтув ўтказилиб, 25 киши қўлга олинган.
«Дастлабки тўпланган маълумотларга кўра, мазкур шахслар ҳозирда Сурияда халқаро террорчилик ташкилоти, ТЖК сафида фаолият юритаётган Ўзбекистон фуқароси, 2001 йилда Тошкент шаҳрида туғилган А.Абдуқаҳҳоров ва унинг раҳнамоларининг ғоявий таъсирига тушиб, интернет орқали экстремистик мазмундаги видеороликларни муҳокама қилиб, ‘ҳижрат’ ва ‘жиҳод’ амалларини бажариш мақсадида Сурияга чиқиб кетишни режалаштирган», — дейилади ИИВ хабарида.
Қайд этишларича, қўлга олинганларнинг уч нафари илгари терроризм ва экстремизм билан боғлиқ жиноятлар учун жазоланган. Ушланган шахсларнинг яшаш жойларида ашёвий далиллар топилган, тергов-суриштирув тадбирлари давом этмоқда.
Маълумот учун, Олий суднинг 2016 йил 26 сентябрдаги қарорига асосан «Тавҳид ва жиҳод катибаси» халқаро террористик ташкилоти фаолияти Ўзбекистон ҳудудида тақиқланган ташкилотлар рўйхатига киритилган.
Мавзуга доир:
- Андижонда ИИБ ва ДХХ «Жиҳодчилар»нинг яна бир гуруҳини қўлга олди
- Бойсунда «Жиҳодчилар» гуруҳи ИИВ ва ДХХ томонидан ушланди
- Фарғонада «Ҳизб ут-Таҳрир» террорчилик ташкилоти аъзолари қўлга олинди
- Тошкент шаҳри ва вилоятида террорчилик гуруҳларига аъзоликда гумонланган 21 киши қўлга олинди
- Тошкентда «Жиҳодчилар»нинг навбатдаги гуруҳи ИИВ ва ДХХ томонидан ушланди
Изоҳ (0)