Ўзбекистонда халқаро авиақатновларга рухсат берилган бўлса-да, ҳеч қандай парвоз амалга оширилмаётганига изоҳ берилди

Ўзбекистон Транспорт вазирлиги ахборот хизмати раҳбари Наврўз Ашурматов 23 июнь, сешанба куни ўтказилган брифингда халқаро авиақатновлар тикланиши юзасидан муҳим маълумоларни тақдим этди.

Хусусан, Ўзбекистонда халқаро авиақатновларга рухсат берилган бўлса-да, лекин ҳеч қандай парвоз амалга оширилмаётганига изоҳ берилди ҳамда чет элда таҳсил оладиган талабалар бу ҳолатда нима қилиши кераклигига аниқлик киритилди.

Наврўз Ашурматовнинг таъкидлашича, 15 июндан Республика махсус комиссияси қарори билан халқаро авиақатновларга рухсат берилган бўлса-да, мунтазам парвозларни тиклаш ва амалга ошириш давлатларда кузатилаётган эпидемик ҳолат ҳамда хорижий мамлакатларда қўйилган чеклов чоралари, виза бериш тартиби санитария талабларидан келиб чиққан ҳолда амалга оширилади.

Унинг сўзларига кўра, Туркия, Россия, БАА, Жанубий Корея, Хитой ва Қозоғистон давлатлари билан июль август ойлари давомида дастлабки босқичда халқаро йўналишларда паритет тамойили асосида ҳар бир томондан мунтазам парвозларни тиклаш бўйича таклифлар Республика махсус комиссиясига тақдим этилган.

Шундан келиб чиқиб, талабалар фақат Республика махсус комиссияси томонидан рухсат этилган йўналишлардан фойдаланган ҳолда таҳсил олиш учун чет элга кетиши мумкин.

Шунингдек, вазирлик вакили «Карантин давридаги халқаро парвозлар чоғида йўловчилар жойлашуви бўйича низом ишлаб чиқилганми? 3 қаторлик чеклов парвозларни қоплайдими?», деган саволга ҳам жавоб берди.

Маълум қилинишича, халқаро авиақатновлар фаолиятини қайта тиклашда белгиланган карантин чекловларига қатъий риоя этилади. Чекловлар парвозларга маълум миқдорда молиявий зарар келтириши табиий. Чипталар сотилмасдан қолиб кетишининг олдини олиш мақсадида биринчи навбатда йўловчи оқими катта бўлган йўналишларда паритет асосида қатновларни йўлга қўйиш режалаштирилган.

Эслатиб ўтамиз, Ўзбекистон коронавирус пандемияси сабабли тўхтаб қолган халқаро авиқатновларини 15 июндан бошлаб «қизил», «сариқ» ва «яшил» рейслар принципи асосида қайта тиклади.

Шунингдек, Жанубий Кореянинг Asiana Airlines компанияси июнь июль ойларида Ўзбекистонга бир нечта рейсларни амалга оширишни режалаштирмоқда. Туркиянинг Turkish Airlines халқаро авиакомпанияси Истанбул—Тошкент авиарейслари 1 июлдан қайта йўлга қўйилишини маълум қилди.

Бундан ташқари, Тожикистон 1 июлдан бошлаб Ўзбекистон билан халқаро авиақатновларни қайта тиклайди. Россия ва Ўзбекистон ўртасидаги доимий авиақатновлар 15 июлдан тикланиши кутилмоқда.