Тошкент вилоятида коронавирус инфекцияси билан боғлиқ эпидемиологик вазиятдан келиб чиққан ҳолда Ўрта Чирчиқ тумани 20 июнь ҳолатига кўра «қизил» ҳудуд, деб белгиланди. Бу ҳақда туман ҳокимлиги ахборот хизмати хабар берди.
Таъкидланишича, Тошкент шаҳри Бектемир туманидаги шароб заводида ишловчи Ўрта Чирчиқда яшайдиган 5 нафар фуқарода инфекция аниқлангани боис ҳозирда уларнинг хонадонлари қатъий назоратга олинган. Шунингдек, улар билан мулоқотда бўлганлар ҳам тиббий кузатув остига олинган.
Маълум қилинишича, Ўрта Чирчиқдаги 4 та ички кўча карантинга ёпилган. Ушбу кўчаларда ҳаракатланиш тақиқланган. Йўл ёқалари ва кўзга кўринарли жойларга «қизил» ҳудуд белгилари ўрнатилди.
Аввалроқ Ўрта Чирчиқ тумани туғруқ бўлимидаги беморда коронавирус инфекцияси тасдиқлангани тўғрисида хабар берилганди.
Эслатиб ўтамиз, Ўзбекистонда 21 июнь куни 162 кишида коронавирус аниқланди, сутка давомида 87 нафар фуқаро соғайди.
Изоҳ (0)