Хоразм вилояти Хива туманида электр энергияси тармоғига ўзбошимчалик билан ноқонуний уланмоқчи бўлган ва симёғочга тирмашиб чиққан фуқаро ҳалок бўлди. Бу ҳақда «Хоразм ҳудудий электр тармоқлари» АЖ хабар қилган.
«21 июнь куни соат 06:30 ларда Хива туманининг «Журён» маҳалласида фермер хўжалиги раҳбари Н.И. Хива туман электр таъминоти корхонасини огоҳлантирмасдан, ўзбошимчалик билан фермер хўжалиги насосини тармоққа ноқонуний равишда улаш учун 0,4 киловаттлик электр устунига чиққан.
Тармоққа уланиш пайтида трансформаторнинг 2-фидери ўчирилмагани оқибатида фуқарони катта кучланишли ток урган ва у воқеа жойида ҳалок бўлган», дейилади хабарда.
Мазкур ҳолат юзасидан тегишли ташкилотлар ўрганиш ишларини бошлаган.
«Хоразм ҳудудий электр тармоқлари» корхонаси фуқаролардан ўзбошимчалик билан электр тармоғига уланмасликни, бунинг учун тегишли тартибда ариза билан мурожаат қилишни сўраган.
Изоҳ (0)