O‘rtasaroydagi karantin markazida fuqaro konteyner ichida o‘zini osib qo‘ydi

Toshkent viloyatidagi karantin markazida fuqaro o‘z joniga qasd qildi. Bu haqda huquq-tartibot organlaridagi manba “Daryo”ga ma’lum qildi.

Ma’lum bo‘lishicha, 20-iyun kuni soat taxminan 4:00-5:00 oralig‘ida 42 yoshli, asli Farg‘ona viloyatidan bo‘lgan fuqaro karantinga olingan fuqarolarni vaqtinchalik saqlash konteyneri ichida o‘zini osib qo‘ygan.

U koronavirusga tahlil topshirgan bo‘lgan, biroq tahlil natijalari hali chiqmagan. Fuqaro aynan qachon, qayerdan kelgach, O‘rtasaroydagi karantin markaziga joylashtirilgani hozircha ma’lum emas.

Fuqaro nima sababdan o‘z joniga qasd qilgani ham noma’lum. Qayd etishlaricha, hozirda vakolatli organlar tomonidan holat yuzasidan tergovoldi tekshiruv olib borilmoqda.

Toshkent viloyatining Yuqori Chirchiq tumani O‘rtasaroy hududidagi 16 gektar maydonni egallagan, 10 700 kishini qabul qilishga mo‘ljallangan karantin markazi aprel oyida foydalanishga topshirilgan edi. Bu yerga xorijdan O‘zbekistonga kirib kelgan fuqarolar 14 kunlik karantinga joylashtiriladi.