Абитуриентларни онлайн рўйхатдан ўтказиш тартиби ҳақида видеоқўлланма ишлаб чиқилди

Абитуриентларни онлайн рўйхатдан ўтказиш хизмати 2020 йилнинг 20 июнидан бошлаб my.gov.uz манзили бўйича Ягона интерактив давлат хизматлари портали (ЯИДХП)да ишга туширилди. Бу ҳақда Uzinfocom маркази хабар қилган.

Хабарда қайд этилишича, бу йил имтиҳон топшириш учун бешта ОТМга ариза тақдим қилиш мумкин (ўтган йили учта ОТМга ҳужжат топшириш мумкин эди) ва устуворлиги юқори бўлган тартибга кўра автоматик равишда белгиланади.

Абитуриентнинг муваффақиятли рўйхатдан ўтишда қуйидагиларни амалга ошириши лозим:

• my.gov.uz манзили орқали ЯИДХПда (ёки abitur.dtm.uz веб-сайтида) рўйхатдан ўтиш;
• Ўзбекистондаги уяли алоқа операторларидан бирида фаол телефон рақамига эга бўлиш;
• агар абитуриент 2020 йилдан аввалги йилларда таълим муассасаларини тугатган бўлса, у ҳолда тўлов қилиш (бу ҳолда SMS хабарнома хизмати ёқилган банк картасига эга бўлиш);
• ОТМни диққат билан танлаш ва уларни устуворлиги юқори бўлган тартиб бўйича белгилаш;
• таълим шакли ва тилини танлаш.

Рўйхатдан ўтиш жараёни охирида имтиҳон фанлари (йўналишлари) рўйхати ва 2020 йил қабул комиссиясида абитуриентнинг рўйхатдан ўтиш варақаси берилади.2019 йилда ажратилган ўринлар сони 111 130 тани ташкил қилган бўлса, 2020 йилда бу кўрсаткич 150 375 тани ташкил қилмоқда. Ўз ўрнида бу йил ўтган йилга нисбатан бакалавр ва магистратурага қабул қилинадиган абитуриент ва талабалар сони 39 245 тага кўпайган.Ҳукумат қарорига мувофиқ, бакалавр йўналиши бўйича ОТМга кириш тест синовлари жараёнига қуйидаги ўзгартиришлар киритилди:

• абитуриентларни рўйхатдан ўтказиш 2020 йилнинг 20 июнидан 20 июлига қадар (шу жумладан, 20 июль ҳам) бўлган муддатда амалга оширилади;
• рўйхатдан ўтиш ЯИДХП (my.gov.uz) ва Давлат тест марказининг расмий веб-сайти (abitur.dtm.uz) орқали амалга оширилади;
• абитуриентларга тест синовлари ўтказиладиган фанлар кетма-кетлиги билан бир вақтда бакалавриатнинг бешта йўналиши бўйича имтиҳонларда иштирок этиш ҳуқуқи берилади;
• кириш имтиҳонлари абитуриент томонидан танланган тегишли бакалавр йўналишига мос келадиган иккита фан бўйича ўтказилади.

Ушбу хизмат Ахборот технологиялари ва коммуникацияларини ривожлантириш вазирлиги (mitc.uz), Ягона интегратор Uzinfocom, Электрон ҳукумат ва рақамли иқтисодиёт лойиҳаларини бошқариш маркази ҳамда Давлат тест маркази (dtm.uz) томонидан амалга оширилган.

Ўзбек ва рус тилларидаги тўлиқ видеоқўлланма abitur.dtm.uz, Facebook, Mover, Youtube’га жойлаштирилган.