18 июнь санасида Ўзбекистонда коронавирус инфекцияси тасдиқланган 85 нафар бемордан 28 нафари аҳоли орасида аниқланган бўлса, 19 июнь куни эса 179 нафар бемордан 29 нафари аҳоли орасида тасдиқланди. Икки кунлик маълумотга кўра, умумий касалланиш кўрсаткичи ҳам, аҳоли орасида коронавирусга чалиниш ҳолати ҳам кундан кунга кескин ошган. Бу ҳақда Соғлиқни сақлаш вазирлиги хабар берди.
19 июнь куни аҳоли орасида коронавирус аниқланиш ҳолатларини ҳудудлар кесимида кўриладиган бўлса, Тошкент шаҳрида 24 нафар, Наманган вилоятида 3 нафар, Тошкент вилоятида эса — 2 нафарни ташкил этган.
Жумладан, Чилонзор туманидаги савдо дўкони сотувчисида (Сергели туманида истиқомат қилади, 18 июндан тана ҳарорати кўтарилгач, шифокорга мурожаат қилган), Мирзо Улуғбек туманида яшовчи фуқаро ҳамда унинг ўғли ва қизида, пойтахтда бўлиб турган Бухоро вилояти Қоракўл туманида яшовчи фуқарода (профилактика мақсадида Тошкент шаҳар СЭОМ лабораториясига намуна топширган), Учтепа туманида яшовчи 3 нафар нафақада бўлган фуқароларда ҳамда Юнусобод туманидаги бир оиланинг 6 нафар аъзосида (тана ҳарорати кўтарилгач, тумандаги 52-оилавий поликлиникага мурожаат қилган) касаллик қайд этилган.
Бундан ташқари, Наманган вилояти Поп туманида яшовчи 3 нафар фуқарода (17 июнь куни тана ҳарорати кўтарилгач, шифокорга мурожаат қилган), Тошкент вилояти Чирчиқ шаҳар ҳокимлиги сектори иш юритувчисида (профилактика мақсадда намуна олинган) ҳамда Ўрта Чирчиқ тумани туғруқ бўлимидаги беморда ҳам коронавирус инфекцияси тасдиқланган. Мазкур касаллик аниқланган фуқароларнинг аксарияти тана ҳарорати кўтарилгач, шифохонага мурожаат қилган ва намуна топширган. Айни пайтда ушбу ҳолатлар юзасидан эпидемиологик суриштирув ишлари олиб борилмоқда.
«Айрим ҳудудлардаги туман ва маҳаллаларда аҳоли орасида коронавирусга чалинганлар гуруҳ-гуруҳ бўлиб чиқаётгани вазиятнинг хавотирли эканини кўрсатмоқда. Бундай ҳолатда одамларнинг бир жойга йиғилмаслиги, турли тадбирларни ўтказишдан вақтинча тийилиб туришлари коронавируснинг олдини олишда жуда муҳим ҳисобланади», — дейилади хабарда.
Ўзбекистонда 20 июнь соат 17:00 ҳолатига кўра, 7 соат ичида 94 киши коронавирус аниқланди. Касалланганларнинг умумий сони 6119 нафарга етди. Ҳозирда касалланганларнинг 4273 нафари коронавирус инфекциясидан соғайган, 19 нафари касаллик асоратларидан вафот этган.
Изоҳ (0)