Бухоро вилоятининг Қоракўл туманида жойлашган МЧЖга қарашли газ қувуридан 8 тоннадан зиёд газоконденсат хом ашёсини ўғирлаган 7 нафар фуқаронинг иши судга оширилди. Бу ҳақда ИИВ ҳузуридаги Тергов департаменти хабар берди.
Маълумотларга кўра, Қоракўл туманида яшовчи 7 нафар шахс 15 февраль куни соат 00:10 да газ қувуридан газоконденсат маҳсулотларини яширин равишда талон-торож қилаётганида МЧЖнинг қўриқлаш ходимлари томонидан ушланган.
Таъкидланишича, улар Учқур—Кулбешкак йўналишидаги газ қувурини бир неча кун илгари тешиб, шланг орқали полиэтилен қоплама билан ўралган ҳовузга газоконденсат йиғган. Мазкур ҳовузда қиймати 9,2 миллион сўмлик 8 тоннадан ошиқроқ газоконденсат хом ашёси топилган.
Ҳолат юзасидан Қоракўл тумани ИИБ ҳузуридаги Тергов бўлими томонидан Жиноят кодексининг 169-моддаси 3-қисми «г» банди («Ўғирлик») билан жиноят иши қўзғатилган.
Жиноят иши бўйича ушланган шахсларга нисбатан тегишли моддалар билан айблов эълон қилиниб, «қамоққа олиш» тарзидаги эҳтиёт чораси қўлланилган. Ҳозирда жиноят иши айблов хулосаси билан тегишли судловга юбориш масаласини ҳал қилиш учун прокуратурага юборилган.
Аввалроқ Қоракўлдаги газ қувуридан 20 тоннадан зиёд газоконденсат хом ашёсини ўғирлаган саккиз нафар фуқаронинг ҳар бирига икки йилга озодликдан маҳрум қилиш жазоси тайинлангани тўғрисида хабар берилганди.
Изоҳ (0)