Ўзбекистонда коронавирусга чалинган туристларга 3 минг доллар миқдорида компенсация тўланади

Ўзбекистонда коронавирусга чалинган туристларга 3000 минг доллар миқдорида компенсация тўланади. Бу ҳақда «Ахборот 24» дастурида маълум қилинди.

Шунингдек, «Ўзбекистон — хавфсиз саёҳат кафолатланган» санитария-эпидемиология тизими жорий этилиб, бу сайёҳлар учун ўзига хос ҳимоя ёстиғига айланади. Унинг доирасида «Хавфсиз туризм» фонди яратилиб, Инқирозга қарши курашиш жамғармаси ҳисобидан 20 миллиард сўм ажратилади. Кейинчалик фонд сертификатлаш божлари ҳисобига, шунингдек, туристлар билан ишлашни хоҳлаган туроператорларнинг маблағлари ҳисобидан ихтиёрий равишда тўлдириб борилади. Давлат мулки бўлган объектлар ушбу дастур бўйича мажбурий равишда сертификатланади.

«Ички ва ташқи туристлар нафақат коронавирус инфекцияси, балки санитар-эпидемиологик осойишталикка оид бошқа муаммоларга ҳам уларга таъсир кўрсатмаслигига ишонишлари мумкин. Туроператорлар, меҳмонхоналар, умуман, туризм билан боғлиқ барча соҳалар бир қатор талабларни бажариш тўғрисидаги махсус сертификатга эга бўлади. Мазкур сертификатнинг мавжудлиги уларга туристлар билан ишлаш имкониятини беради», — дейди Инновацион соғлиқни сақлаш миллий палатаси раиси Равшан Изамов.

Маълум қилинишича, бу каби амалиёт дунёнинг кўплаб давлатларида кенг қўлланилиб келинади. Карантин вақтида хорижлик туристларга туроператорлар томонидан фақатгина «Ўзбекистон — хавфсиз саёҳат кафолатланган» реестиридан ўрин олган объектлар бўйлаб амалга оширилади.

Аввалроқ Ўзбекистонда ички туризм соҳасида 200 мингдан ортиқ кишини иш билан таъминлаш мумкинлиги маълум қилинган эди.