19 июнь куни «Kun.uz»да Пешку туман болалар ва ўсмирлар спорт мактабида тренерларнинг мажбурий меҳнатга жалб қилинганлиги тўғрисида хабар эълон қилинганди. Жисмоний тарбия ва спорт вазирлиги матбуот хизмати мазкур хабарда қайд этилган вазият юзасидан ўрганиш ўтказилганини маълум қилди.
Вазирлик топшириғига асосан, Бухоро вилояти Жисмоний тарбия ва спорт бошқармаси раҳбари бошчилигидаги масъул ходимлар мазкур ҳолатни ўрганиш учун Пешку туман болалар ва ўсмирлар спорт мактабига борган.
Ҳолат масъуллар томонидан ўрганилгач, ходимларга ўз фаолиятидан ортиқча вазифа берган Пешку туман жисмоний тарбия ва спорт бўлими бошлиғи ҳамда туман болалар ва ўсмирлар спорт мактаби директорига интизомий жазо чоралари қўлланилди. Шунингдек, Бухоро вилояти Жисмоний тарбия ва спорт бошқармаси бошлиғига бу каби ҳолатлар бошқа такрорланмаслиги юзасидан қаттиқ огоҳлантириш берилган.
«Жисмоний тарбия ва спорт вазирлиги тренерлар ва ходимларнинг ўзбошимчалик билан мажбурий меҳнатга жалб этилишини олдини олиш мақсадида тизимдаги барча ташкилот ва муассасаларда тушунтириш ишларини кучайтиради.
Маҳаллий ёшлар учун Пешку тумани болалар ва ўсмирлар спорт мактабига қарашли марказий ўйингоҳ инвестиция дастури асосида қайта реконструкция қилиниб, 2020 йилнинг ўзида фойдаланишга топширилади», – дейилган хабарда.
Изоҳ (0)