Oliy Majlis Senati raisi Tanzila Norboyeva 19-iyun kuni o‘tkazilgan beshinchi yalpi majlis davomida hokimliklarda ishlaydigan mutasaddilarning huquqiy savodxonligi qay darajada ekanligi masalasiga to‘xtalib o‘tdi.
Uning bildirishicha, o‘tgan yilda sudlarda hokimlarning qarorlari bilan bog‘liq 3 mingta ish ko‘rib chiqilgan bo‘lsa, 1 ming 255 tasi, ya’ni 42 foizi noqonuniy, deb topilganini qayd etdi. Buning oqibatida oddiy xalq aziyat chekmoqda.
Senat raisi adliya vaziriga hokimlikda ishlaydigan mutaxassislar huquqiy madaniyatini oshirish zarurligi bo‘yicha tavsiya berdi. Hokimlar tomonidan yo‘l qo‘yilayotgan noqonuniy xatti-harakatlar nazoratga olinib, tegishli choralar ko‘rilishi kerakligini ta’kidladi.
“Adliya vazirligi tomonidan ko‘p ishlar qilinmoqda. Huquqiy targ‘ibotning yangi usullaridan hamda zamonaviy axborot-kommunikatsiya texnologiyalari imkoniyatlaridan keng foydalanilmoqda. Lekin vazirlik o‘z faoliyatida e’tibor qaratishi kerak bo‘lgan jihatlar ham bor. Jamiyatda huquqiy madaniyatni yuksaltirish bo‘yicha tadbirlarni monitoring qilish va baholash to‘g‘risidagi nizom bo‘yicha huquqiy targ‘ibot tadbirlarini monitoring qilish zarur.
Karantin sharoitida ko‘rdikki, qonunchiligimizda masofaviy ta’lim, mehnat munosabatlari, xizmat ko‘rsatish va boshqa masalalar nazarda tutilmagan. Oqibatda davlat xizmatchilari, tadbirkorlar, umuman, aholi uchun ko‘plab noqulayliklar yuzaga keldi. Shularni inobatga olib, vazirlik va idoralarning 30 yaqin vakillaridan iborat tarkibda ishchi guruh, senatorlar boshchiligida tegishli qonunchilik yo‘nalishlari bo‘yicha kichik guruhlar shakllantirildi.
Bu masala Senat kengashi majlisida kelgusi haftada ko‘rib chiqiladi. Fursatdan foydalanib aytmoqchimanki, aynan Adliya vazirligi ushbu jarayonga bosh-qosh bo‘lib, biz bilan uzviy hamkorlikda ish olib borishi zarur”, — dedi Tanzila Norboyeva.
Izoh (0)