Ўзбекистонда 19 июнь соат 10:00 ҳолатига кўра, яна 88 киши коронавирус юқтириб олди ва касалланганларнинг умумий сони 5855 нафарга етди. Бу ҳақда Соғлиқни сақлаш вазирлиги хабар қилди.
Янги касалланиш ҳолатларининг 27 нафари карантин марказидаги фуқаролар орасида, 61 нафари Тошкент шаҳрида (шундан 51 нафари коронавирусга чалинганлар билан мулоқотда бўлиб карантинга олинганлар, 10 нафари аҳоли орасида) аниқланган.
18 июнь соат 23:00 ҳолатига кўра, ўтган бир сутка давомида 85 кишида касаллик аниқланиб, 5767 нафарга етгани тўғрисида хабар берилганди.
Шунингдек, 18 июнда кун давомида жами 68 нафар бемор касалликдан тузалган, Ўзбекистон бўйлаб коронавирус инфекциясидан соғайганлар сони 4199 нафарни (71 фоиз) ташкил этмоқда. Тошкент шаҳрида коронавирус инфекциясидан соғайганлар сони 2130 нафарга етган. Республика миқёсида 1549 нафар фуқаро стационар шароитда даволанишни давом эттирмоқда.
Ҳозирда мамлакатда 1637 нафар беморга шифокорлар томонидан белгиланган стандартлар бўйича даво чоралари кўрилмоқда. Улардан 12 нафари оғир аҳволда.
COVID-19 коронавируси Ўзбекистон ҳудудига кириб келганидан буён жами 19 нафар бемор мазкур инфекция асоратлари оқибатида ҳаётдан кўз юмган.
Изоҳ (0)