Қашқадарё вилоятнинг Муборак ҳамда Косон туманидаги деҳқон озиқ-овқат бозорлари карантин тартибига амал қилмагани боис ёпилади. Бу ҳақда вилоят ҳокими Зоир Мирзаев иштирокида бўлиб ўтган йиғилишда маълум қилинди дея хабар берди вилоят ҳокимлиги ахборот хизмати.
Таъкидланишича, 18 июнь куни вилоят махсус комиссиясининг навбатдаги йиғилиши бўлиб ўтган. Унда сўз олган вилоят ҳокими — комиссия раиси Зоир Мирзаев карантин даврида йўл қўйилаётган камчиликларга тўхталган.
Хабар берилишича, пандемия эълон қилинганидан буён вилоятда жами 15 965 нафар фуқаро карантинга олинган. Уларнинг 3 560 нафари эпидемиологик вазият оғир бўлган давлатлардан келган бўлса, 250 нафари эса чет эл фуқароси ҳисобланади. Карантинга олинганларнинг 14 237 нафари 14 кунлик тиббий кузатув муддатини тамомлаб, соғлиғи қониқарли деб топилган.
Айни кунда вилоятда 1 728 нафар фуқаро карантинга олинган. Уларнинг 1403 нафари уй карантинида, 325 нафари эса стационар шароитда сақланмоқда. Шундан 120 нафари чет эл фуқаролари ҳисобланади.
Вилоят ҳокими йиғилишда Қарши шаҳри, Миришкор, Муборак, Косон, Шаҳрисабз, Чироқчи, Касби, Нишон ва Қамаши туманидаги бозорлар фаолиятидан қониқмаганини айтган.
Эслатиб ўтамиз, Ўзбекистонда 16 июнь куни 230 кишида коронавирус аниқланганди. Ўша куни Қашқадарёда касалликка чалинганлар деярли уч баробарга кўпайди. Вилоятда бугунги кунда коронавирусга чалинганлар 167 нафарга етган бўлиб, 6 нафари соғайиб чиққан.
Изоҳ (0)