Бухоролик фрилансер Саидравшан Шокиров ўзи асос солган Моnday Labs дастурчилар мактаби орқали 2023 йилгача олти мингдан ортиқ дастурчи ва дизайнер тайёрлаб, хорижга IТ хизматларини экспорт қилишни режалаштирган. Бу ҳақда фрилансер «Дарё» мухбири билан суҳбатда айтиб ўтди.
25 ёшли фрилансер Саидравшан Шокиров Toptal.com Бутунжаҳон фрилансерлар дастурчиси саналади. У IТ соҳасида 10 йилдан буён ишлаб келмоқда. Ҳозиргача 38 та йирик лойиҳа устида иш олиб борган.
Малакали, тажрибага эга фрилансер Саидравшан Шокиров 2020 йилнинг январь ойида Моnday Labs академиясини, февраль ойида GRM Neo стартапининг биринчи версиясини яратди. Март ойидан бошлаб, академия ўз фаолиятини онлайн амалга ошириб келмоқда. Май ойида янги лойиҳа — Bot Commerce стартап иш жараёни бошланган.
У айни пайтда учта дастур устида ишламоқда. Булардан биринчиси — дастурчилар мактаби бўлиб, у орқали ёш дастурчи ва дизайнерлар тайёрланади. Иккинчиси —Оutsource, яъни чет эл ва ички бозор учун дастурлар тайёрлашдан иборат. Учинчиси эса стартаплар йўналишида дастурлар яратиш кўзда тутилган.
«Маълумки, фрилансер бу — эркин ишчи. У, асосан, бир марталик иш бажарувчи ёки мавсумий ишларни бажариш учун ёлланувчи шахс ҳисобланади. Буюртма асосида қайсидир иш ёки хизматни муайян ҳақ эвазига, келишилган вақт давомида амалга ошириб беради. Хизматимизга харидорларни ўзимиз топамиз. Шунингдек, буюртмачилар таклифига асосан маълум бир дастурий ишни амалга оширамиз. Биргина Оutsource ва стартап лойиҳамда Латвия буюртмаси асосидаги «Глобал яхта ва катерлар ижара бозорини ривожлантиришга қаратилган Boat.me, «Ўқув марказлар бошқарув системаси (Ўзбекистон) GRM Neo», «Дунё миқёсидаги Premium frilans (АҚШ)нинг Toptal.com» ҳамда «Bot Commerce дастуридаги электрон тижорат учун савдо ботлари яратиш платформаси» каби қатор лойиҳалар шулар жумласидан», — дейди фрилансер Саидравшан Шокиров.
Моnday Labs академиясининг иш бошлаганига олти ой бўлиб, шу давр ичида 832 соат дарс ўтилган. 214 нафар ўқувчи дарсларда иштирок этган ва тамомлаган.
«Айни пайтда яна 396 нафар ўқувчи онлайн дарсларда қатнашиш истагини билдирган. Ёшларимизни мактаб давриданоқ айни йўналишига қизиқтира олишимиз, уларнинг етук мутахассис бўлиб, ўз устида ишлашига йўл очишимиз лозим. Мақсад — истеъдодли болаларни олиб, дастурлашга ўргатиш орқали улар ва иш берувчилар ўртасида алоқаларни мустаҳкамлаш, лозим бўлса, улар яратган дастурларни Ўзбекистон бозорида тарғиб этиб, дунё бозорига олиб чиқиш», — дея сўзида давом этади Саидравшан Шокиров.
Бугун жуда кўп корхона, ташкилотлар IТ технологияси мутахассисларига эҳтиёж сезмоқда. Фаолиятни кенг тармоқда дастурлаштириш корхона, ташкилот учун янги имкониятлар эшигини очса, фрилансер ўз дастурлари орқали йирик миқдордаги маблағга эга бўлади.
Унинг сўзларига кўра, мазкур ишларни бажариш учун юқори тезликдаги интернет ва биржа орқали тадбиркор таклифларини ўзида жамлаган платформа бўлса кифоя. У хорижга бормайди — уйда ўтириб, дастур тайёрлайди ва сотади. Оддий ишчидан энг керакли мутахассисга айланиш мумкин.
«Малакали ва тажрибали ўқитувчилардан билим олган ўқувчиларимиз аста-секин халқаро компаниялар билан кичик лойиҳалари орқали шартномалар тузиб, ишлашни бошламоқда. 2023 йилгача олти минг нафардан ортиқ дастурчи ва дизайнерлар тайёрлаб, хорижга ҳам IТ хизматларини экспорт қилишни кўзлаганмиз. Бундан ташқари, мазкур жараён орқали 250 нафар IТ мутахассисларни иш билан таъминлаш имкони туғилади», — дейди суҳбатдошимиз.
Изоҳ (0)