Путиннинг Иккинчи жаҳон уруши ҳақидаги мақоласи эълон қилинди. У Болтиқбўйи давлатларининг СССРга қўшилиши қонуний бўлгани ҳақида ёзган

АҚШнинг The National Interest журналида Россия президенти Владимир Путиннинг Иккинчи жаҳон уруши ҳақида ёзган мақоласи чоп этилди.

Мақола «Иккинчи жаҳон урушининг 75 йиллигидан олинган ҳақиқий сабоқлар» деб номланган. Путин унда уруш бошланишига сабаб бўлган омиллар, турли давлатнинг биринчи босқичдаги ҳаракатлари ва Молотов-Риббентроп пакти ҳақида фикр билдирган.

«Медиазона» нашрининг қайд этишича, Путинга кўра Болтиқбўйи давлатларининг СССР мамлакатлари орасига кириши Молотов-Риббентроп келишувига кўра мазкур ҳудудлар ҳукуматлари розилиги билан амалга ошган ва ўша даврнинг халқаро ҳамда давлат ҳуқуқий меъёрларига мос келади.

Россия президенти Иккинчи жаҳон уруши ҳақида мақола ёзмоқчи эканини 2019 йил декабрь ойида маълум қилган. 14 июнда Кремль мақоланинг тайёр ҳолатга келганини билдирган эди.

Путиннинг ёзишича, Германия ташқи ишлар вазири Риббентропнинг Москвага икки кунлик ташрифи Иккинчи жаҳон уруши бошланишининг асосий сабабларидан бири эканини кўрсатиш адолатли мушоҳада бўлмайди. Барча етакчи давлатлар уруш бошланишида маълум маънода айбдор. Уларнинг ҳар бири хато қилган, бошқа бир давлатни алдаш учун бир томонлама манфаатни кўзлаб ёки яқин орада содир бўладиган жаҳон миқёсидаги инқироздан узоқ туришга интилган. Оқибатда мазкур бепарволиклар ва жамоавий тарзда хавфсизлик тизимининг шакллантирилмагани миллионлаб одамларни ҳалок қилган.

The National InterestПутин 2019 йил сентябрь ойида Европарламент сталинизм, миллатчилик ва бошқа тоталитар тизимларни қоралаш ҳақидаги резолюцияни қабул қилганидан кейин Иккинчи жаҳон уруши ҳақида мақола ёзиш мақсади борлигини билдирганди. Резолюцияда Иккинчи жаҳон уруши кўп жиҳатдан Молотов-Риббентроп келишуви оқибатида бошлангани қайд этилган.

Путин резолюцияга кескин муносабат билдириб, фашистлар Германияси ва Совет Иттифоқини бир хил деб баҳолаш ўтакетган сурбетлик эканини таъкидлаган.