Ўзбекистондаги Олий таълим муассасаларига қабул масалалари юзасидан АОКАда ўтказилган брифингда бош вазир ўринбосари Беҳзод Мусаев жорий йилги кириш имтиҳонларининг адолатли ўтиши қай тартибда назорат қилиниши ҳақида маълумот берди, деб хабар қилади «Kun.uz».
Мусаевнинг таъкидлашича, абитуриентларни имтиҳонга текширувдан ўтказиб киритиш масаласи ҳуқуқни муҳофаза қилиш органлар билан кўриб чиқилмоқда.
«Пандемия шароитида абитуриентни текшириш орқали контактга киришиш содир бўлади. Бироқ биз ҳам текширувчини ҳимоя қиладиган, ҳам абитуриентларнинг назоратини таъминлайдиган тизим ишлаб чиқамиз», – деди Беҳзод Мусаев.
Бош вазир ўринбосарининг сўзларига кўра, имтиҳон ўтадиган муддатда барча мобил телефонларни ўчириб қўйишнинг имкони йўқ, бу қолган одамларга қийинчилик туғдириши мумкин.
«Мўлжалимиз бўйича август ойи республикада тўлиқ тест ойи бўлади. Шунинг учун ҳамма телефонларни ўчирмаган ҳолда назоратни ташкил қиламиз. Каттароқ тадбирларга бизни ҳам текширувдан ўтказиб, кейин киритишади. Худди шу каби ичкарига беркитиб телефон олиб кирмоқчи бўлган абитуриентларни аниқлаш қийин эмас. Агар кимда телефон аниқланса, тестга яқинлаштирилмайди, керак бўлса, улар кейинги йил ҳам имтиҳонга киритилмайди», – деди у.
Беҳзод Мусаев қоидалар аввалдан эълон қилиниши, қоидабузарларга қаттиқ чора кўрилишини билдирган.
Аввалроқ Ўзбекистонда ОТМга кириш имтиҳонларини 1 августдан бошлаш режалаштирилаётгани тўғрисида хабар берилганди.
Мавзуга доир: Ўзбекистонда 2019/2020-ўқув йилида қанча талаба бакалавриатда таҳсил олгани маълум қилинди
Изоҳ (0)