Ўзбекистонга санитария-эпидемиологик вазият барқарор бўлган (яшил рейслар) Япония, Жанубий Корея, Хитой ва Исроилдан (охирги 14 кун ушбу мамлакатларда бўлиб турган) кириб келган шахслар карантин назоратига олинмайди. Telegram’даги @koronavirusinfouz каналининг хабар беришича, бу ҳақдаги қарор Республика махсус комиссияси томонидан қабул қилинган.
Мавзуга доир: Хитойда коронавирусга чалинганлар сони бир суткада 66 кишига, Жанубий Кореяда эса 34 кишига ошди
Айни вақтда коронавирус инфекцияси билан касалланиш ҳолатлари камайган (сариқ рейслар) Европа Иттифоқи, Малайзия, Таиланд, Сингапурдан (охирги 14 кун ушбу мамлакатларда бўлиб турган) кириб келган шахслар 14 кун давомида уй карантини назоратига олинади.
«Коронавирус инфекцияси билан касалланиш ҳолатлари камаймаган (қизил рейлар — эвакуация рейслари) қолган бошқа давлатлар, жумладан, БАА, Туркия, Эрон, Афғонистон, Россия ва бошқа МДҲ давлатларидан кириб келган шахслар 14 кун давомида карантин назоратида сақланади», — дейилади Республика махсус комиссияси ахборотида.
Қўшимча қилинишича, санитария-эпидемиологик вазият барқарор бўлган ва яхшиланаётган мамлакатларда авиарейс қатнови кунига қадар узлуксиз 14 кундан кам бўлган, шунингдек, оғир санитария-эпидемиологик вазият сақланиб қолаётган давлатлардан транзит орқали келаётган шахсларга Ўзбекистонга келиш учун авиабилетлар реализация қилинмайди.
Аввалроқ Республика махсус комиссиясининг 14 июнь куни эълон қилинган қарори билан Ўзбекистондаги кучайтирилган санитария-гигиена назорати 1 августгача амал қилиши, 15 июндан бошлаб эса ўзбекистонликларнинг иш ва ўқиш мақсадида чет элга авиация орқали чиқишига рухсат берилгани маълум қилинган эди.
