Ўзбекистонда ўзини ўзи молиялаштириш тизимига ўтган ОТМларга ўзини ўзи тўлиқ молиявий таъминлаш миқдоридан келиб чиқиб, тўлов-контракт асосида ўқитиш қийматини белгилаш ҳуқуқи берилди, деб хабар бермоқда Олий ва ўрта махсус таълим вазирлиги матбуот хизмати.
Бу ҳақда «2020/2021-ўқув йилида Ўзбекистон Республикасининг олий таълим муассасаларига ўқишга қабул қилишнинг давлат буюртмаси параметрлари тўғрисида»ги Президент қарорида белгиланди.
Ўзини ўзи молиялаштириш тизимига ўтган ОТМлар ректорлари бакалавриат таълим йўналишлари ва магистратура мутахассисликлари бўйича белгиланган тўлов-контракт миқдори ҳақидаги маълумотларни бир ҳафта муддатда оммавий ахборот воситалари ва интернет тармоғида эълон қилади.
Эслатиб ўтамиз, Президентнинг 2019 йил 11 июлдаги қарори билан 2020 йилдан бошлаб айрим ОТМлар босқичма-босқич ўзини ўзи молиялаштириш тизимига ўтиши белгиланганди. «Олий таълим муассасаларини босқичма-босқич ўзини ўзи молиялаштириш тизимига ўтказиш тўғрисида»ги ҳукумат қарори билан 2020 йил 1 январдан бошлаб тажриба-синов тариқасида ўзини ўзи молиялаштириш тизимига ўтаётган 10 та олий таълим муассасалари рўйхати тасдиқланган. Булар:
- Самарқанд давлат чет тиллар университети
- Самарқанд иқтисодиёт ва сервис институти
- Тошкент давлат юридик университети
- Тошкент давлат иқтисодиёт университети
- Тошкент молия институти
- Тошкент давлат шарқшунослик институти
- Тошкент фармацевтика институти
- Ўзбекистон давлат жаҳон тиллари университети
- Урганч давлат университети
- Тошкент темир йўл муҳандислари институти
Изоҳ (0)