Андижон вилоятида 2020 йил 11 июнь куни тадбиркорлик муҳитини, стартаплар экотизимини ривожлантириш, ёшлар ташаббусларини қўллаб-қувватлаш ҳамда ҳудуддаги ижтимоий муаммоларни ҳал этиш мақсадида ёшлар ўртасида инновацион ечимлар ва онлайн стартаплар танловига старт берилди. Бу ҳақда «Дарё»га Ёшлар иттифоқи вилоят кенгаши ахборот хизмати хабар бермоқда.
Маълум бўлишича, Президент Шавкат Мирзиёевнинг 2020 йил 21—22 май кунлари вилоятга ташрифи чоғида ёшлар тадбиркорлигини қўллаб-қувватлаш, уларнинг энг яхши стартап лойиҳаларини амалга ошириш учун 2 миллиард сўм грант маблағи ажратилиши бўйича топшириқ берилган.
Мазкур топшириқ ижросини таъминлаш мақсадида Андижон шаҳридаги Digital City IТ паркида вилоятдаги ёш тадбиркорлар ва стартапчи ёшлар иштирокида онлайн учрашув ташкил этилган. Учрашувда республикада стартап лойиҳалар йўналишида ютуқларга эришган тажрибали тренерлар иштирокида маҳорат дарслари ўтказилган ва шу куни ушбу лойиҳага старт берилган.
Ёшлар иттифоқи вилоят кенгаши ахборот хизмати раҳбари Жавоҳир Абубакировнинг айтишича, учрашувда Ёшлар иттифоқи ҳамда Андижон вилояти Ахборот технологиялари ва коммуникацияларни ривожлантириш бошқармаси ўртасида меморандум имзоланган.
Меморандумга кўра, энг яхши деб топилган лойиҳалар Ёшлар иттифоқи марказий кенгашининг «Ёшлар — келажагимиз» жамғармаси ва Ўзбекистон Республикаси ёшлар тадбиркорлигини қўллаб-қувватлаш маркази томонидан молиялаштирилади.
Изоҳ (0)