Тошкент шаҳри Олмазор туманида 9 июнь куни 31-йўналишда ҳаракатланувчи Isuzu автобуси «КамАЗ» ортидан урилиб, йўл-транспорт ҳодисасини содир этди. Бу ҳақда Ички ишлар вазирлиги Йўл ҳаракати хавфсизлиги бош бошқармаси хабар берди.
Маълум қилинишича, жорий йилнинг 9 июнь куни соат 14:00 да ҳайдовчи К.Н. 31-йўналишдаги Isuzu автобусини ТҲАЙ кўчасидан Бешқўрғон кўчасига бошқариб кетаётиб ЙТҲ содир этган. Автобус Қорақамиш 2/4 мавзеси «Тансиқбоев» бекати қаршисида ўзидан олдинда ҳаракатланаётган ҳайдовчи М.С. бошқарувидаги «КамАЗ» юк машинасининг орқа томонига урилган.
Натижада Isuzu автобуси ҳайдовчиси К.Н. ва унинг чиптачиси А.Ф. тан жароҳати олиб шифохонага мурожаат қилган.
Йўл ҳаракати хавфсизлиги бош бошқармаси томонидан «Дарё»га маълум қилинишича, ЙТҲ юз берган вақтда автобус салонида 5-6 нафар йўловчи бўлган, уларнинг ҳеч бири жароҳат олмаган.
Мазкур ЙТҲ юзасидан Тошкент шаҳар ИИББ ЙҲХБ масъул ходимлари томонидан суриштирув ишлари олиб борилмоқда.
Эслатиб ўтамиз, Тошкент шаҳрида ҳамда Ўзбекистоннинг барча «сариқ« ва «яшил» ҳудудларида 8 июндан бошлаб жамоат транспорти ўз фаолиятини қайта бошлади.
Изоҳ (0)