Toshkent shahri Olmazor tumanida 9-iyun kuni 31-yo‘nalishda harakatlanuvchi Isuzu avtobusi “KamAZ” ortidan urilib, yo‘l-transport hodisasini sodir etdi. Bu haqda Ichki ishlar vazirligi Yo‘l harakati xavfsizligi bosh boshqarmasi xabar berdi.
Ma’lum qilinishicha, joriy yilning 9-iyun kuni soat 14:00 da haydovchi K.N. 31-yo‘nalishdagi Isuzu avtobusini THAY ko‘chasidan Beshqo‘rg‘on ko‘chasiga boshqarib ketayotib YTH sodir etgan. Avtobus Qoraqamish 2/4 mavzesi “Tansiqboyev” bekati qarshisida o‘zidan oldinda harakatlanayotgan haydovchi M.S. boshqaruvidagi “KamAZ” yuk mashinasining orqa tomoniga urilgan.
Natijada Isuzu avtobusi haydovchisi K.N. va uning chiptachisi A.F. tan jarohati olib shifoxonaga murojaat qilgan.
Yo‘l harakati xavfsizligi bosh boshqarmasi tomonidan “Daryo”ga ma’lum qilinishicha, YTH yuz bergan vaqtda avtobus salonida 5-6 nafar yo‘lovchi bo‘lgan, ularning hech biri jarohat olmagan.
Mazkur YTH yuzasidan Toshkent shahar IIBB YHXB mas’ul xodimlari tomonidan surishtiruv ishlari olib borilmoqda.
Eslatib o‘tamiz, Toshkent shahrida hamda O‘zbekistonning barcha “sariq“ va “yashil” hududlarida 8-iyundan boshlab jamoat transporti o‘z faoliyatini qayta boshladi.
Izoh (0)