Berluti модалар уйи ўз автомобилини тақдим этди

Эркаклар пойабзали, кийим-кечак ва аксессуарларини ишлаб чиқарувчи Berluti компанияси ўз автомобилини яратди. Berluti Buggy номини олган автомобиль ташқи кўриниши билан Volkswagen томонидан Meyers Manx баггисини ёдга солади, деб хабар беради Motor.

Berluti Buggy худди Meyers Manx каби классик «Қўнғиз» шассисида яратилган. Шунингдек, двигатели ҳам ўхшаш — ҳаво ёрдамида совутилувчи 90 от кучига эга 1,6 литрли карбюраторли мотор.

Машинанинг ташқи томони полиэстердан тайёрланган, ҳимоя ёйи эса икки мақсадга мўлжалланган: у йўловчини ортга ирғиб кетишидан ҳимоя қилади ва юкхона вазифасини ҳам бажаради. Баггининг оғирлиги 500 килограммга тенг.

Автомобиль салони Berluti услубида ҳашамат билан безатилган. Унинг ичига қўлбола Venezia чарми қопланган, шифт қисмини эса Berluti бош дизайнери Крис ван Аше томонидан Signature Canvas сумкалари учун яратилган нақшлар безаб турибди. Бошқа эксклузив деталлар орасида — чармдан ишланган ечилувчи чамадон ва капотга ўрнатилган палладийли латун логотип мавжуд.

Оргинал Meyers Manx модели 1964 йилдан 1971 йилга қадар B.F. Meyers & Co фирмаси томонидан ишлаб чиқарилган. Багги Volkswagen Beetli шассисининг қисқароқ вариантида яратилган. 2000 йилда машинани ишлаб чиқариш қайта йўлга қўйилган ва Meyers Manx компанияси чекланган миқдорда классик баггини тақдим этган. 2002 йилда Beetli платформасида Manxter 2+2 ва Manxter DualSport версиялари яратилди. 2009 йилга келиб эса, Kick-Out Manx номи остида классик машинанинг янгиланган версияси пайдо бўлди.