Европа Иттифоқининг Ўзбекистон учун 2021—2027 йилларда ажратиладиган молиявий ёрдами коронавирус пандемияси оқибатларини юмшатишга ва мамлакатда камбағаллик даражасини пасайтиришга йўналтирилади. Бу ҳақда Инвестициялар ва ташқи савдо вазирлиги хабар берди.
Вазирлик томонидан маълум қилинишича, 10 июнь куни Ўзбекистон бош вазирининг ўринбосари — инвестициялар ва ташқи савдо вазири Сардор Умурзоқов ва Европа Иттифоқи савдо бўйича комиссари Фил Хоган ўртасида видеоконференция бўлиб ўтди. Суҳбат давомида коронавирус тарқалишига қарши курашда Ўзбекистон ва Европа Иттифоқи ўртасидаги ўзаро ҳаракатларнинг устувор масалалари, шунингдек, ҳамкорликнинг қатор долзарб йўналишлари муҳокама қилинди.
«COVID-19’нинг Ўзбекистон иқтисодиётига салбий таъсирини юмшатиш ва камбағалликни қисқартириш каби келгусидаги ҳамкорликнинг устувор йўналишлари аниқланди. Бу мақсадларга Европа Иттифоқининг 2021—2027 йиллар учун навбатдаги бюджет даври доирасида ажратиладиган маблағларнинг сезиларли қисмини йўналтириш режалаштирилган», — дейилади вазирлик хабарида.
Таъкидланишича, Ўзбекистон ва Европа Иттифоқи ўртасида Кенгайтирилган шериклик ва ҳамкорлик тўғрисидаги битим лойиҳаси бўйича келишишни тезлаштириш борасидаги ишларни фаоллаштириш юзасидан келишувга эришилди, бунинг учун яқин вақтларда музокараларнинг навбатдаги олтинчи раундини онлайн тарзда ўтказиш истиқболлари муҳокама қилинди.
Музокаралар давомида молиявий-техник ҳамкорлик соҳасидаги ижобий суръатлар қайд этилди. Европа томонига умумий қиймати 40 миллион еврони ташкил этувчи «Қишлоқ хўжалиги соҳасини бюджетдан қўллаб-қувватлаш ва Ўзбекистонга қўшимча ёрдам» лойиҳаси доирасида 10 миллион евро миқдоридаги биринчи транш учун алоҳида миннатдорчилик билдирилди.
Бундан ташқари, 2020 йилда режалаштирилган бир қатор икки томонлама тадбирларни видеоконференсалоқа орқали ўтказиш билан боғлиқ ташкилий масалалар кўриб чиқилди. Улар орасидан «Ўзбекистон — ЕИ» ҳамкорлик қўмитасининг 17-йиғилиши, иқтисодиёт, савдо ва инвестициялар бўйича «Ўзбекистон — ЕИ» қуйи қўмитасининг 15-йиғилиши ва тараққиёт мақсадларида ҳамкорлик бўйича «Ўзбекистон — ЕИ» қуйи қўмитасининг 3-йиғилиши ўрин олган.
Аввалроқ Ўзбекистон Республикаси Президенти Шавкат Мирзиёев Европа кенгаши президенти Шарл Мишел билан коронавирусга қарши кураш масаласини муҳокама қилганди.
Мавзуга доир: Ўзбекистон ва Европа Иттифоқи кенгайтирилган шериклик ва ҳамкорлик тўғрисидаги битим бўйича музокараларни жадаллаштиради
Изоҳ (0)