Қонунчилик палатаси депутати ва «Юксалиш» умумиллий ҳаракати раиси Акмал Бурҳонов «Хусусий бандлик агентликлари тўғрисида»ги қонунга киритилаётган ўзгартиш ва қўшимчалар ҳақида маълумот берди.

Депутатнинг ёзишича, шу кунларда Қонунчилик палатасида Вазирлар Маҳкамаси томонидан киритилган «Хусусий бандлик агентликлари тўғрисида»ги қонунга ўзгартиш ва қўшимчалар киритиш ҳақидаги қонун лойиҳаси кўриб чиқилмоқда. Ушбу мавзу долзарб бўлганлиги учун Акмал Бурҳонов лойиҳада таклиф этилаётган бир қатор муҳим ўзгаришларни келтириб ўтган:

1. Хорижда иш қидираётган шахсларни ишга жойлаштириш бўйича кўрсатилган хизматлар учун тўловларни чет эллик иш берувчи ҳисобидан амалга ошириш механизми жорий этилади;
2. Хорижда иш қидираётган шахсларни ишга жойлаштириш бўйича хизматлар кўрсатиш учун Бандлик ва меҳнат муносабатлари вазирлиги ҳузуридаги жамғармага захира қилиб қўйиладиган маблағларни миллий валютада базавий ҳисоблаш миқдори 8 500 баравари (тахминан 185 минг АҚШ доллари) миқдорида этиб белгиланмоқда (ҳозирда ушбу миқдор 50 минг АҚШ долларини ташкил этади);
3. Хусусий бандлик агентликлари томонидан ишга жойлаштириш соҳасида ахборот ва маслаҳат хизматлари кўрсатилган тақдирда, базавий ҳисоблаш миқдорининг бир бараваридан ошмаган миқдорда ҳақ олинади;
4. Хусусий бандлик агентликлари томонидан хизматлар кўрсатиш тўғрисидаги шартномалари Бандлик ва меҳнат муносабатлари вазирлигининг «labor migration» дастурий мажмуасида реал вақт режимида рўйхатдан ўтказиш тартиби жорий этилади;
5. Хусусий бандлик агентликлари томонидан хорижда иш қидираётган шахсларни ишга жойлаштириш бўйича хизматлар кўрсатишдан олдин уларга кўрсатиладиган хизматлар учун тўловлар ундирилмаслиги белгиланмоқда.

Эслатиб ўтамиз, Ўзбекистонда хусусий бандлик агентликлари тўғрисидаги қонун 2018 йил октябрь ойида кучга кирган эди. 2019 йил кузидан бери Human, Korean and migrations ва бошқа хусусий бандлик агентликларининг раҳбарларига нисбатан фирибгарлик моддаси бўйича жиноят ишлари қўзғатилгани ҳақида хабарлар пайдо бўлди (маълумотларга кўра, саккизта агентликка қарши жиноят ишлари қўзғатилган).

Хусусий бандлик агентликлари муаммоси 2019 йил декабрида Олий Мажлис Сенатида қизғин баҳс-мунозараларга сабаб бўлганди. Хусусан, сенатор Фаррух Дадахўжаев мигрантларнинг маблағларини ҳимоя қилиш механизми йўқлиги учун Бандлик ва меҳнат муносабатлари вазирлигини танқид қилиб, агентликлар билан банк ҳисоб-китобларини аккредитив асосида олиб боришни таклиф қилган эди.

Ўз навбатида, Бандлик ва меҳнат муносабатлари вазирлиги қонунга ўзбекистонликларни хорижда ишга жойлаштириш бўйича виждонсиз хизмат кўрсатилишидан ҳимоя қила оладиган тузатишларни киритиш ниятини билдирган эди.