«Барселона» ҳимоячиси Нелсон Семеду Ла Лига тикланиши олдидан мусобақа протоколини бузди, дея хабар бермоқда Diario Sport.
26 ёшли португалиялик футболчи 8 июнь куни 20 дан ортиқ одам тўпланган туғилган кун байрамида иштирок этган.
Семеду Барселона провинциясининг Кастельдефельс шаҳрида бўлиб ўтган тадбирда бошқа иштирокчилар сингари, тиббий ниқоб тақмаган ва ижтимоий масофа сақламаган.
Нелсон Семеду шу тариқа ҳукумат ва Испания Футбол Лигаси тавсияларига амал қилмаган. Ҳудуд маъмурияти 15 кишидан ортиқ одам тўпланган жойга бормасликни сўраган бўлса, Ла Лига футболчилардан атрофдаги инсонлар билан алоқаларни чеклашга чақирган.
Каталония клубидаги манбанинг нашрга маълум қилишича, «кўк-анорранглилар» Семедунинг бу тадбирда қатнашишини билмаган. «Барселона» ушбу масалани клуб ичида ҳал қилмоқчи.
Эслатиб ўтамиз, коронавирус пандемияси туфайли тўхтаб қолган Ла Лига ўйинлари 11 июнь санасидан давом эттирилади. «Барселона» 13 июнь куни «Мальорка» майдонига сафар қилади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)