O‘zbekistonning sobiq iqtisodiyot va sanoat vaziri Botir Xo‘jayev “Rosgeologiya”ning O‘zbekistondagi yangi tashkil etilgan filiali “Rosgeo Uzbekistan” kompaniyasiga rahbar etib tayinlandi. Bu haqda “Rosgeologiya” tomonidan ma’lum qilindi.
Ma’lum qilinishicha, “Rosgeologiya” va O‘zbekiston Geologiya va mineral resurslar davlat qo‘mitasi tomonidan vakolatli etib belgilangan “O‘zbekgeofizika” aksiyadorlik jamiyati Orol dengizi akvatoriyasi va unga tutush hududlarda geologik modelni aniqlashtirish, neft-gaz istiqbollarini o‘rganish va uglevodorod potensialini baholash uchun geologik xizmat ko‘rsatish to‘g‘risida shartnoma imzoladi.
“Rosgeologiya” bosh direktori Sergey Gorkovning ma’lum qilishicha, mazkur shartnoma kompaniya O‘zbekistonda amalga oshiradigan keng qamrovli dasturning birinchi bosqichi hisoblanadi va mamlakatning resurs imkoniyatini sezilarli darajada oshirishga qaratilgan.
Shartnoma 2020-yil 27-fevralda “Rosgeologiya” va O‘zbekiston Geologiya va mineral resurslar davlat qo‘mitasi o‘rtasida imzolangan O‘zbekiston Respublikasi hududlarining iqtisodiy imkoniyatini rivojlantirish uchun yer ostidan foydalanish sohasida mineral xomashyo resurslaridan samarali foydalanish bo‘yicha hamkorlik to‘g‘risidagi kelishuvning ijrosini ta’minlash uchun tuzildi.
Vazirlar Mahkamasining 2020-yil 23-apreldagi qarori bilan “Rosgeologiya” Orol dengizi va unga tutush hududlarda uglevodorod xomashyosi imkoniyatini geologik o‘rganish dasturining ijrochisi etib belgilangan.
Mazkur dasturni va hamkorlikning boshqa yo‘nalishlarini amalga oshirish uchun “Rosgeologiya” O‘zbekistonda o‘zining filiali “Rosgeo Uzbekistan” kompaniyasini tashkil qildi.Eslatib o‘tamiz, Botir Xo‘jayev joriy yilning fevral oyida iqtisodiyot va sanoat vaziri lavozimini tark etib, O‘zbekiston bosh vazirining sanoatning va kooperatsiya aloqalarini rivojlantirish masalalari bo‘yicha maslahatchisi lavozimiga tayinlangandi. Aprel oyi boshida esa Botir Xo‘jayevning pensiyaga chiqishi munosabati bilan mazkur lavozimni tark etgani ma’lum qilingandi.
Izoh (0)