Андижон вилоятининг Хўжаобод туманида яшовчи 80 ёшли отахон Обиджон Абдунабиевга туғилганлиги ҳақидаги гувоҳнома ва фуқаролик паспорти топширилди, дея хабар берди «Дарё» мухбири Умиджон Мамарасулов.
Давлат хизматлари агентлиги Андижон вилояти бошқармаси ахборот хизматининг маълум қилишича, Обиджон Абдунабиев 1940 йилда Хўжаобод туманида туғилган. Бироқ шу пайтга қадар отахоннинг шахсини тасдиқловчи ҳужжати бўлмаган. Турли йилларда ҳудуддаги жамоа хўжаликларида ишлаган ва бир муддат туман киностудиясида киномеханик сифатида меҳнат қилган отахон ҳужжатлари бўлмаганлиги сабабли кўп йиллик меҳнати ҳисобга олинмай, ўз вақтида пенсияга чиқолмаган.
Обиджон Абдунабиевнинг айтишича, бундан 65 йил аввал унга фуқаролик паспорти берилган, лекин ҳеч қанча вақт ўтмасдан паспортини йўқотиб қўйган. Шундан сўнг, бир неча йил давомида ҳужжатини тиклаш учун ҳаракат қилган бўлса-да, натижа бўлмаган.
Текширувлар давомида отахон ўз вақтида уйида туғилганлиги, отаси 1942 йилда урушга кетиб, 1943 йилда жанг майдонида ҳалок бўлганлиги ва бошқа сабаблар туфайли унга туғилганлиги ҳақидаги гувоҳнома олинмаганлиги аниқланган.
Обиджон ота гувоҳнома олиш учун Хўжаобод туман ФҲДЁга мурожаат қилган ва мурожаатга мувофиқ, туман ФҲДЁ бўлими ва Давлат хизматлари маркази ходимлари отахонга туғилганлиги ҳақидаги гувоҳнома ва фуқаролик паспортини топширган.
Изоҳ (0)