Конго Демократик Республикасида Эбола вируси тарқалишни бошлади. Бу ҳақда Жаҳон соғлиқни сақлаш ташкилоти маълум қилди, деб ёзмоқда «РБК».
Хабар берилишича, вируснинг янги тўлқини натижасида 12 киши касалланган. ЖССТ маълумотларига кўра, касалланиш ҳолатлари мамлакатнинг шимоли-ғарбидаги Мбандака шаҳрида қайд этилган.
Ташкилот томонидан маълум қилинишича, вирус тўққиз кишида тасдиқланган, яна уч кишида дастлабки ташхис қўйилган. Олти нафар бемор вафот этган.
ЖССТ 1 июнь куни Мбандакада олти киши Эбола билан касаллангани ҳақида маълум қилган. Аниқланишича, янги ҳолатлар касалликнинг Конгода 2018 йилда тарқалгани билан боғлиқ эмас. Ўшанда шаҳарда вирусдан 33 киши вафот этган.
Айни пайтда Конго коронавирус инфекцияси ва қизамиқ тарқалишига қарши кураш олиб бормоқда. ЖССТнинг сўнгги маълумотларига кўра, мамлакатда 4 мингдан ортиқ одам COVID-19 билан касалланган.
Эслатиб ўтамиз, Жаҳон соғлиқни сақлаш ташкилоти жорий йилнинг февраль ойида мазкур мамлакатда Эбола безгаги авж олгани муносабати бу касаллик билан боғлиқ фавқулодда ҳолатни узайтирган.
Маълумот учун, Эбола касаллиги биринчи марта 1976 йилда аниқланган. Ушбу вирусли касаллик 2013–2016 йилларда Ғарбий Африкада жуда кенг тарқалиб кетди. Гвинеяда бошланган касаллик Либерия ва Сьерра-Леонега ҳам ўтиб кетди. Касалликнинг ўзига хос хавфли жиҳати унда касалланганлар орасида ўлим ҳолатининг юқорилигидадир. Ўша пайтда 11 315 киши ёки касалларнинг 50 фоизи вафот этди. 2019 йилнинг июль ойида Конго Демократик Республикасида қайд этилганидан кейин ЖССТ халқаро фавқулодда ҳолат эълон қилди. Мамлакатда касаллик пайдо бўлганидан буён 2 200 киши вафот этди.
Изоҳ (0)