SpaceX компанияси Starship космик кемаси прототипи бўлган учириш комплексининг таъмирлаш ишларини якунламоқда. Унинг синови 10 июнь кунига режалаштирилган. Бу ҳақда компания асосчиси Илон Маск ўзининг Twitter’даги саҳифасида маълум қилди.
«SpaceX 29 май куни Бока Чикада Starship SN4 космик кемаси прототипининг портлаши оқибатида шикастланган учириш комплексини таъмирлаш ишларини якунламоқда», — дейилади хабарда.
Маълумотларга кўра, яқин кунларда SN5 космик кемаси старт майдончасига йўл олади. Синовлар 10 июнга режалаштирилган. Режага кўра, Starship SN5’нинг синов парвози 150 метр баландликда амалга оширилади.
Эслатиб ўтамиз, Маск парвози 27 май куни ноқулай об-ҳаво сабаб қолдирилган Starship кемаси Falcon 9 ракетасининг ўрнини эгаллашини хоҳлаганди. SpaceX режасига кўра, Starship Ой ва Марсга юк ташиб, яна Ерга қайтиб келиши керак. Бу прототиплар билан содир бўлаётган биринчи кўнгилсиз ҳодиса эмас. Апрель ойининг бошларида Starship’ни суюқ азот билан тўлдириш вақтида ҳам портлаш содир бўлганди. 2019 йилнинг ноябрида эса Starship Мк1 герметикликка синов вақтида портлаб кетган.
Таъкидлаш керакки, SpaceX биринчи марта бортида икки астронавт — Дуглас Ҳёрли ва Роберт Бенкен бўлган Crew Dragon кемасини 30 май куни (Тошкент вақти билан 31 майга ўтар кечаси) Флоридадаги Кеннеди космик марказидаги майдончадан муваффақиятли учирди.
Изоҳ (0)