Наманган вилояти Учқўрғон туманида қалбаки 100 АҚШ долларини муомалага киритган шахс қўлга олинди. Бу ҳақда Бош прокуратура «Дарё»га маълум қилди.
Бош прокуратура ҳузуридаги департаментнинг Учқўрғон туман бўлимига С.Х. исмли тадбиркор мурожаат қилиб, савдо вақтида қалбаки 100 доллар бериб кетишганини маълум қилган.
Таъкидланишича, С.Х. га тегишли савдо дўконидан 40 минг сўмлик маҳсулот харид қилган фуқаро тўлов эвазига ёнида сўм йўқлигини баҳона қилган ва қалбаки 100 доллар бериб, 960 минг сўм қайтим олиб кетган.
Ушбу ҳолат бўйича ИИБ ходимлари билан ҳамкорликда қалбаки АҚШ долларини ўтказишда гумон қилиниб ушланган фуқаро Ж.О. ходимларнинг қонуний талабларига фаол қаршилик кўрсатган. У жавобгарликдан қочиш мақсадида ҳамёнидаги ҳар бири 100 АҚШ доллари бўлган қалбаки 3 дона купюраларнинг 2 донасини йиртиб ташлаган.
Мазкур ҳолат юзасидан фуқаро Ж.О.га нисбатан Жиноят кодексининг 176-моддаси 2-қисми «а» банди билан жиноят иши қўзғатилиб, тергов ҳаракатлари ўтказилмоқда.
Аввалроқ Андижонда 100 минг сўмлик қалбаки купюраларни бозорда муомалага киритмоқчи бўлган шахс қўлга олингани ҳақида хабар берилганди.
Изоҳ (0)