АҚШ ҳукумати 5 июнь, жума куни Ўзбекистон Санитария-эпидемиологик осойишталик агентлигига коронавирус тести ўтказиш учун зарур воситаларни етказиб берди. Бу ҳақда АҚШнинг Ўзбекистондаги элчихонаси матбуот хизмати хабар берди.
Бу USAID ҳадя этаётган тест воситаларининг биринчи тўплами бўлиб, у 15 мингта тест ўтказишга етарли QIAGEN RNA реагентларини жамлаган 60 та қутидан иборат. 10 мингта тест учун мўлжалланган яна 40 та шундай қути бир неча ҳафтадан сўнг Ўзбекистонга етиб келади.
Маълумот учун, USAID Ўзбекистонга коронавирусга қарши кураш учун 3,9 миллион доллар бермоқда. Бу ёрдам лабораторияларни кенг кўламли тестлар ўтказишга тайёрлаш, соғлиқни сақлаш муассасаларида инфекция тарқалишининг олдини олиш ва назорат қилиш, COVID-19’га оид тезкор чораларни такомиллаштириш, касаллик юқтирганлар ҳолатини бошқариш тизимини кучайтириш, вирус тўғрисидаги дезинформацияга қарши курашиш ҳамда жамоаларни ҳамжиҳатликда ишлашга жалб қилишни ўз ичига олади.
Эслатиб ўтамиз, USAID коронавирусга қарши кураш учун Ўзбекистонга февраль, март ва апрель ойларида ёрдам кўрсатди. Шунингдек, АҚШ Касалликларни назорат қилиш ва олдини олиш маркази (CDC/CAR) Марказий Осиё ҳукуматларининг COVID-19’га қарши саъй-ҳаракатларини қўллаб-қувватлаш мақсадида 6,8 миллион доллар ажратди, бунинг 2,07 миллион доллари эса Ўзбекистонга берилди.
Бундан ташқари, АҚШ ҳукумати USAID орқали COVID-19 пандемияси даврида Марказий Осиёда муҳожирларни ҳимоя қилиш учун 2 миллион доллар ажратишни режалаштирган.
Изоҳ (0)