Қайси тумандан, қайси мактабдан битирувчиларнинг олий таълимга кириш кўрсаткичи паст бўлса, ўша туман ва мактаб мутасаддиларига нисбатан чора кўрилади. Бу ҳақда халқ таълими вазири Шерзод Шерматов Халқаро пресс-клубнинг Фарғона вилоятидаги сайёр сессиясидаги чиқишида маълум қилди.
Халқ таълими вазирининг сўзларига кўра, мактаблар фаолиятини икки қисмга бўлиш мумкин — олий таълимга тайёрлов ва касбга йўналтириш.
«Биринчи йўналишдаги фаолият — олий таълимга, университетга тайёрлаш. Қайси туманда мактаб битирувчиларининг олий таълимга кириш даражаси паст бўлса, демак, ўша туман бошқармаси яхши ишламаган, уларга нисбатан чора кўрилади. Кейинги йилдан бошлаб таълим бошқармалари меҳнат фаолияти самарадорлигини баҳолашнинг асосий йўналиши шу бўлади», — дейди Шерматов.
Унинг айтишича, Фарғонанинг ўзида 942 та мактаб бўлса, 100 тага яқинидан бирорта битирувчи олий таълимга кирмаган. Бунинг натижасида қатор муаммолар келиб чиқади — маҳаллада олий маълумотли одам бўлмайди, энг оддий мутахассислар ҳам етишмайди. «Шу боис битирувчилари олий таълимга кирмаган мактаб директорига, шу туман бошқармасига чора кўрилади. Битта ҳам битирувчиси университетга кира олмаслиги мумкин эмас. Ҳеч бўлмаса, биттаси бўлса ҳам кириши керак», — дейди у.
Шунингдек, 7-синфдан бошлаб профориентация — касбга йўналтириш жараёни бошланиши кераклигини таъкидлади.
«Ўқувчи қайси йўналишни танлайди? Олий таълим бўлса, университетга тайёрланади, ўзига қизиқ бўлган соҳага керакли фанлар чуқурлаштириб ўқитиладиган дастур билан шуғулланади. Қайси касблар борлигини ҳам мактабларда ўқитмас эканмиз, ўқувчилар қайси касблар борлигини билмайди.
Ҳамма сектор раҳбарларига асосий вазифа қилиб қўйилди — ўқувчи 10-синфни битириб, ёзги таътилга чиққанида сектор раҳбарлари уларни кимгадир шогирдликка, қайсидир йўналишга ишга қўяди. Мактабни битираётганда касбга мослашиб, пул топишни ўрганиб чиқади. Бирор жиноятчиликка, ноқонуний ҳаракатга, хорижда қийналиб, кам маошли ишга кетишига ҳожат қолмайди», — деб таъкидлаган Шерзод Шерматов.
Эслатиб ўтамиз, Халқ таълими вазирлигида 2019 йилнинг октябрь ойида бўлиб ўтган навбатдаги кенгайтирилган Ҳайъат йиғилишида ўқувчилари ОТМларга киришда ёмон натижа кўрсатадиган мактаб раҳбарлари жазоланиши айтилган эди.
Изоҳ (0)