Тошкентнинг Амир Темур хиёбони, Бухоро ва Нуронийлар кўчалари оралиғида жойлашган «Газеталар ишлаб чиқариш мажмуаси биноси қисми» ҳамда Бухоро кўчаси, 10-уй манзилидаги собиқ Свердлов номидаги концерт зали (биржа биноси) Forsa Barsa компаниясига танловсиз, тўғридан-тўғри «ноль» қийматда тақдим этилмоқда.
«Kun.uz»нинг ёзишича, Forsa Barsa компанияси ушбу биноларни келгуси 5 йилда 15 миллион доллар миқдорида инвестиция киритиб, тўлиқ реконструкция қилиш мажбуриятини олган. Компания ушбу объектлар негизида гастроль-концерт фаолиятини ташкил этиши ва камида 150 та янги иш ўрнини яратиши лозим.
Корхоналар ва ташкилотларнинг ягона давлат регистри маълумотларига кўра, Forsa Barsa’нинг асосий фаолият тури макарон маҳсулотлари ва шунга ўхшаш унли маҳсулотлар ишлаб чиқариш. Компаниянинг 97 фоизи Мубин Ўтбосаровга тегишли. Очиқ маълумотларга кўра, Ўтбосаров «Савдогар-банк» кузатув кенгаши аъзоларидан бири ҳисобланади. У банк кузатув кенгашида Dinus Non қўшма корхонаси вакили сифатида кўрсатилган.
Dinus Non’нинг асосий фаолият тури — нон, хамирдан янги тайёрланган қандолат маҳсулотлари, торт ишлаб чиқариш. Dinus Non’нинг таъсисчилари қаторида Ҳабибулло Йўлдошев бор, ўз навбатида Йўлдошев «Хоразм шакар»нинг кузатув кенгаши аъзоси. Шакар заводи кузатув кенгашидаги Эгамберган Ўробоев, Фёдор Ким, ижро органи раҳбари Фазлиддин Сирожиддинов эса «Савдогар-банк»нинг ҳам кузатув кенгаши аъзоларидир. Айни вақтда уларнинг барини «Илк плюс» инвесторлар уюшмаси бирлаштириб туради.
Блогер @davletovuz ушбу янгиликка муносабат билдираркан, Forsa Barsa компаниясига тақдим этилаётган жойларнинг «сотихи тиллага тенг» эканини қайд этиб ўтган: «Шу жойларни қаловини топиб, 15 миллион долларга сотса ҳам бўладиган, сотихи тиллага тенг ерлар».
Аввалроқ «Газеталар ишлаб чиқариш мажмуаси биноси қисми»нинг ёнидаги («Пойтахт» савдо маркази олдидаги) автотураргоҳни устав капитали 40 доллар бўлган Чехия компанияси камида 25 миллион доллар инвестиция киритиш мажбурияти билан қўлга киритгани, бу ерда тўққиз қаватли тижорий бино қурилиши ҳақида хабар берилган эди.
Маълум бўлишича, таъсисчилари орасида Ўзбекистон фуқаролари ҳам бўлган Чехия компанияси ушбу майдонни Тошкентда инвестицион муҳитни яхшилаш бўйича тажриба ўтказилган 2018 йилнинг 15 августидан 2019 йилнинг 15 августигача бўлган оралиқда — 2019 йил 28 мартида қўлга киритган. Бу даврда шаҳар ҳокимлиги инвестицион фаолият учун ер участкаларини ва давлат мулки объектларини уларнинг майдонидан қатъи назар тўғридан-тўғри музокаралардан сўнг шартнома имзолаш орқали тақдим этиши мумкин эди.
Изоҳ (0)