Президент Шавкат Мирзиёев Фарғона вилоятига ташрифи чоғида Тошлоқ туманидаги «Uz-Segang» қўшма корхонасида иш жараёни билан танишди. Бу ҳақда Президент матбуот хизмати хабар берди.
Таъкидланишича, Фарғона вилоятидаги 6 та ихтисослашган туманда 20 та мева-сабзавотчилик ва узумчилик кластери ташкил этилган. Бу йил уларда 288 минг тонна маҳсулот етиштирилиб, 120 минг тоннасини экспортга йўналтириш режалаштирилган. Бунинг учун сиғими 330 минг тоннадан ортиқ бўлган музлаткичли омборхоналар, 25 та логистика маркази, 90 та қайта ишловчи корхона фаолият кўрсатмоқда.
Қайд этилишича, Италиянинг ICEOL технологияси гилосни ранги ва катталиги бўйича саралаб қадоқлайди. Сифатсизларини лазер нури орқали аниқлаб, алоҳида жойлайди. Жанубий Кореядан келтирилган СNP линияси анорни худди шундай саралайди. Меванинг ичидаги пишмаган ёки чирий бошлаган жойни ҳам аниқ кўрсатади. Корхона маҳсулотлари «Global G.A.P.» халқаро сертификатига эга.
Президент бу корхонани доимий хом ашё билан таъминлаш масаласига аҳамият қаратди. Бунинг учун унга ҳудуддаги боғларни бириктириш, янги боғлар ва лаборатория ташкил этиш бўйича кўрсатмалар берди.
Изоҳ (0)