Forbes энг кўп ҳақ тўланадиган машҳурлар рейтингини эълон қилди. Унда нашр миллиардер унвонидан маҳрум қилган Кайли Женнер етакчилик қилди

Forbes журнали энг кўп даромад оладиган машҳурларнинг навбатдаги рейтингини эълон қилди — 2020 йилда рўйхат бошидан Кайли Женнер ўрин олган.

Ўтган йили Женнернинг даромадлари 590 миллион долларни ташкил этган. Кайли ушбу маблағларнинг 540 миллионини Kylie Cosmetics компаниясининг 51 фоиз улушини сотиш орқали ишлаган.

Рейтингнинг иккинчи поғонасидан 170 миллион доллар билан мусиқачи Канье Уэст ўрин олган. У даромадининг асосий қисмини Yeezy кроссовкалар бренди орқали ишлаб топган.

Шунингдек, дастлабки ўнталикда теннисчи Рожер Федерер (106 миллион), футболчи Криштиану Роналду (105 миллион), Лионель Месси (104 миллион), Неймар (96 миллион), баскетболчи Леброн Жеймс (88 миллион), шунингдек, актёрлар Тайлер Перри (97 миллион) ва Дуэйн Жонсон (87 миллион) ҳамда телебошловчи Говард Стерн (90 миллион) ўрин олган.

Аввалроқ Forbes журнали америкалик модель Кайли Женнернинг бойлигини қайтадан баҳолаб, унинг қийматини миллиард доллардан 900 миллион долларга тушириб юборган эди. Кейинроқ Женнер «Дунёнинг энг ёш миллиардер аёли» мақомидан маҳрум бўлишида онасини айблаганди.