Санъат вакиллари орасида оилавий машҳурликка эришган ёки ота-онасига ҳавас қилиб шоу-бизнесни танлаган фарзандлар йўқ эмас. Қуйида ҳинд киносаноатида актриса сифатида яхши маълум бўлган оналар ва улар йўлини танлаган қизлар ҳақида маълумот берамиз.
Ҳема Малини — Эша Деол
Ҳинд кино саноатига 70 йиллар охирида кириб келган Ҳема Малини кўп вақт ўтмай кино юлдузига айланган. Истеъдодли ва мафтункор актриса ўзига хос роллари билан мухлислар қалбидан жой олган. Ҳеманинг қизи Эша Деол актрисалик карьерасида онасичалик муваффақиятга эриша олмаган бўлса-да, қўлидан келганича маҳоратини кўрсатишга уринган. У суратга тушган фильмлардан «Тезлик» омадли чиққан.
Димпл Кападия — Твинкл Кҳанна
«Бобби», «Севги денгизи» фильмларидаги унутилмас роллари билан яхши маълум бўлган Димпл ўсмирлик чоғидаёқ Film Awards’га сазовор бўлишга улгурган. Актриса айни вақтда 60 ёш бўлишига қарамай, фильмларда суратга тушишда давом этмоқда. Кападия хонимнинг қизи Твинкл киносаноатда ўрнини топа олмаган бўлса ҳам, мафтункорлиги ва қиёфаси билан эсда қолган. Твинкл Болливуд юлдузи Акшай Кумарга турмушга чиққан ва ҳозирда фарзандлар тарбиясидан ташқари тадбиркорлик ва дизайнерлик билан шуғулланади.
Танужа — Кажол
Танужа маҳоратли роллари билан мухлислар қалбидан жой олган актрисалардан бири ҳисобланади. Унинг қизи Кажол эса аллақачон Болливудда ўз ўрнини топган, мухлислари учун севимли бўлишга муваффақ бўлган. Она-бола актрисалар бир-бирига икки томчи сувдек ўхшайди, уларнинг ҳаётий қарашлари билан ҳам бир хил. Кажол Ажай Девган билан турмуш қурган ва уларнинг икки нафар фарзанди бор.
Шармила Тагор — Соҳа Али Кҳан
Ўз вақтида гўзаллик тимсоли бўлган Шармиланинг актрисалик маҳорати чиройидан кам бўлмаган. Унинг қизи Соҳа Болливудда машҳур бўлмаса-да, ижроси мухлисларда ижобий таассурот қолдирган.
Апарна Сен — Конкона Сен Шарма
Чиройли табассум ва ўтли нигоҳ она-болани бошқалардан ажратиб турувчи хусусият ҳисобланади. Апарна нафақат актриса, балки режиссёр сифатида ҳам ҳинд киносаноатида ўз ўрнини топган. Қизи Конкона номи машҳур актрисалардан бўлмаса ҳам, турли жанрдаги ролларни қойилмақом ижро этадиган истеъдодли актриса ҳисобланади.
Изоҳ (0)