«Арсенал» собиқ ҳужумчиси Тьерри Анри АҚШда афроамерикалик Жорж Флойднинг полициячи томонидан ўлдирилганига ўз муносабатини билдирди.
«Сўнгги бир неча кун давомида Жорж Флойднинг фожиали ва кераксиз ўлими ҳақидаги ҳис-туйғуларимни аниқ ифода этиш мақсадида фикрларимни жамладим. Фожиадан кейин дарҳол ҳиссиётга берилиб, нафрат ва ғазаб билан ёзиш жуда осон бўлар эди. Улар ҳали ҳам мавжуд бўлса-да, уриниб кўраман.
Нега бу воқеалар 2020 йилда содир бўлмоқда? Нега айнан ўша ирқчилар ўзларининг севимли жамоасида ўйнайдиган қора танлиларни олқишлайди-ю, аммо кўчадаги қора танлиларни ҳақорат қилади? Нега буни жамиятимиздан олиб ташлаш учун қилаётган ишлар самара бермаяпти? Бу жуда узоқ вақтдан бери давом этиб келмоқда.
Мен зўравонлик, босқинчилик ёки мол-мулкни талон-торож қилишни ёқламайман, чунки бу ҳеч қандай муаммони ҳал қилмайди ва бундан фақат ирқчиликдан азият чекаётганлар зарар кўради. Нега ўз оиласини боқиш учун бутун умр меҳнат қилган одамлар, бошдан кечираётган муаммоларга қарши норозилик билдириб, ўз меҳнатларининг натижасини йўқ қилиб азоб чекиши керак? Бу жавоб эмас.
Биз зудлик билан ўзгаришлар ўтказишимиз керак. Ўзгаришларни талаб қиламиз ва энг муҳими, биз ўзгаришларга ҳақлимиз. Буни ҳозир қилинг. Шунинг ўзи кифоя», — деб ёзиб қолдирган Анри ўзининг Instagram’даги саҳифасида.
Эслатиб ўтамиз, Миннеаполис шаҳри полицияси вакили 25 май куни 46 ёшли афроамерикалик Жорж Флойдни қўлга олиш чоғида уни тутиб, ерга ётқизган ва тиззаси билан бўйнини босган. Полициячи Дерек Шовин уни шу тариқа узоқ вақт ушлаб туриши Жорж Флойднинг ўлимига сабаб бўлган. Ҳолат акс этган видео ижтимоий тармоқларда тарқалгач, АҚШнинг турли ҳудудларида норозилик намойишлари бошланган. АҚШнинг 25 та шаҳрида оммавий норозиликлар сабаб комендантлик соати эълон қилинди.
Мавзуга доир:
- Месси, Неймар ва Мбаппе ирқчиликка қарши қаратилган #BlackOutTuesday флешмобига қўшилди (фото)
- ФИФА ва УЕФА Бундеслига футбочиларининг Жорж Флойд ўлими сабаб амалга оширган акциясига муносабат билдирди
- Кевин-Принс Боатенг ирқчилик ҳақида: Полиция мени ҳеч қандай сабабсиз тўхтатади. Сайр қилиб юрганимда одамлар кўчанинг нариги тарафига ўтиб кетади
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)