Туркиянинг «Бешиктош» клубида ижара асосида тўп сураётган «Фиорентина» ярим ҳимоячиси Кевин-Принс Боатенг ирқчиликнинг қандай шаклларига дуч келиши ҳақида гапирди.
«Асосан маймунга хос имо-ишоралар қилишади. Ҳар бир урган голингиз учун сизга банан ирғитишади. ‘Биз сени қутига солиб, ватанингга қайтариб юборамиз’.
‘Н’ ҳарфи билан бошланадиган сўз (негр) кўп ишлатилади. Улар сув идишларини улоқтириб, шундай бақиради: ‘Балки, биз сени тозалаб қўярмиз’.
Европада ирқчилик яширишга ҳаракат қилинади. Одамлар буни кўп ҳам кўрсатавермайди. Лекин агар улар кўпчилик бўлса, ўзларига бўлган ишончи ортиб бақириши мумкин.
Машинамда кўчада сайр қилиб юрганимда одамлар бемалол кўчани кесиб ўтади, менга эса ғалати бир нигоҳ билан қарайди. Полиция ҳам ҳеч қандай сабабларсиз мени тўхтатади. Бу шунчалик тез-тез содир бўладики, балки улар татуировкам ҳамда қиммат машинам борлиги ва қора танли бўлганим учун мени жиноятчи деб ўйлашар.
Бутун умрим давомида футболчи бўлиш учун меҳнат қилдим. Сиз мени фақат ташқи кўринишим учунгина айблаяпсизми? Болалигимда ҳам вазият яхшиланиши ўрнига ҳаммаси баттар тус оларди», — дейди Боатенг.
33 ёшли ганалик футболчи жорий мавсумда Туркия чемпионатида 6 та ўйин ўтказиб, 2 та голга муаллифлик қилди.
Эслатиб ўтамиз, Миннеаполис шаҳри полицияси вакили 25 май куни 46 ёшли афроамерикалик Жорж Флойдни қўлга олиш чоғида уни тутиб, ерга ётқизган ва тиззаси билан бўйнини босган. Полициячи Дерек Шовин уни шу тариқа узоқ вақт ушлаб туриши Жорж Флойднинг ўлимига сабаб бўлган. Ҳолат акс этган видео ижтимоий тармоқларда тарқалгач, АҚШнинг турли ҳудудларида норозилик намойишлари бошланган. АҚШнинг 25 та шаҳрида оммавий норозиликлар сабаб комендантлик соати эълон қилинди.
Мавзуга доир:
Изоҳ (0)