Tailand Vazirlar Mahkamasi koronavirus pandemiyasidan jabrlangan iqtisodiyotni qo‘llab-quvvatlash chorasi sifatida mamlakatda ko‘chmas mulk solig‘ini 2020-yil oxirigacha 90 foizga kamaytirishga qaror qildi. “RIA Novosti”ning xabar berishicha, bu haqda hukumat saytida e’lon qilingan.
Unda aytilishicha, Vazirlar Mahkamasi 2-iyun kuni bo‘lib o‘tgan yig‘ilishda 2019-yilda joriy qilingan ko‘chmas mulk (yer va imoratlarga) solig‘ini 2020-yil davomida 90 foizga kamaytirish to‘g‘risida qaror qabul qilgan.
Bundan tashqari, ilgari fevraldan may oyigacha uch oyga qoldirilgan daromad solig‘i bo‘yicha hujjatlar topshirish muddati yana ikki oyga, 2020-yil avgustiga qoldirilgan.
Tailand hukumati pandemiyadan aziyat chekkan jismoniy va yuridik shaxslarga iqtisodiyotni yaxshilashga yordam berishga qaratilgan bir qator chora-tadbirlarni amalga oshirmoqda. O‘tgan hafta parlament quyi palatasi iqtisodiyotni yaxshilash uchun favqulodda budjet to‘g‘risidagi uchta qonun loyihasini ma’qulladi va ushbu maqsadlarga jami 58 milliard dollar ajratdi. Senat ham seshanba kuni ushbu qonun loyihasini ma’qullagan.
Tailand hukumati tomonidan ma’qullangan birinchi qonun loyihasida yuridik va jismoniy shaxslarga yordam berish va iqtisodiyotni rag‘batlantirish uchun 34,9 milliard dollardan ortiq miqdordagi qarz mablag‘larini jalb qilishga ruxsat berildi, ikkinchisida — kichik va o‘rta korxonalarga past foizli kreditlar berish uchun 15,8 milliard dollardan ortiq budjet ajratish, uchinchisida — mamlakat moliyaviy tizimini barqarorlashtirish va Tailandning iqtisodiy xavfsizligini ta’minlash uchun budjet ajratildi.
Mamlakatda 3-iyun kuni koronavirusga chalinish bo‘yicha atigi 1 ta holat qayd etilgan. Aksariyat kasallanish holatlari kabi bu safar ham chetdan yuqtirilgan. Kasallik Saudia Arabistoni orqali kelgan 23 yoshli talabada aniqlangan.
Tailandda birinchi kasallanish holati yanvar oyida qayd etilgan bo‘lib, ayni paytda ularning umumiy soni 3 084 kishiga yetgan. Bemorlarning 2 968 nafari sog‘aygan, 58 nafari vafot etgan.
Izoh (0)