Самарқанд вилоятида жуда кўп миқдордаги ун маҳсулотларини талон-торож қилиш ҳолати аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти матбуот хизмати «Дарё»га маълум қилди.
Бош прокуратура ҳузуридаги департаментнинг Самарқанд вилоят бошқармаси томонидан ўтказилган терговга қадар текширувида «Самарқанддонмаҳсулотлари» АЖга қарашли 191-сонли дўкон сотувчиси Д.У. 391,7 миллион сўмлик маҳсулотларни сотишдан тушган нақд пулларни жамият кассасига кирим қилмасдан камомадга йўл қўйганлиги, шунингдек, ушбу ҳолат юзасидан Д.У. 350 миллион сўмни «Агробанк» АТБ Самарқанд ҳудудий филиалига топширганлиги ҳақида квитанцияни тақдим этган бўлса-да, 350 миллион сўм нақд савдо пули мазкур банк филиалига кирим қилинмагани аниқланган.
Департаментнинг Жомбой туман бўлими томонидан ўтказилган терговга қадар текширувда «Жомбойдонмаҳсулотлари» ОАЖга қарашли 170-сонли дўкон сотувчиси А.Т. ҳам ўзига ишониб топширилган 193,2 миллион сўмлик ун маҳсулотларини сотишдан тушган маблағларни жамиятга топширмасдан, ўзлаштириш йўли билан талон-торож қилгани ойдинлашган.
Юқоридаги ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Мавзуга доир:
- Қамашида ўзгага тегишли 14 тонна унни сотиб юборган тадбиркорлар қўлга олинди
- Самарқандда фирибгарлик йўли билан ун харид қилиб, аҳолига қиммат нархда сотиб келган шахсларга жиноят иши қўзғатилди
- Фарғонада фирибгарлик йўли билан ун харид қилиб, аҳолига қиммат сотаётган корхонага нисбатан жиноят иши қўзғатилди
Изоҳ (0)