Олий ва ўрта махсус таълим вазирлиги карантин шароитида Ўзбекистондаги давлат ОТМда талабаларнинг контракт нархи ўзгармаганига изоҳ бериб, Олий таълим муассасаларидаги харажатлар карантин вақтида ҳам ўзгармаганини маълум қилди.
Таъкидланишича, амалдаги тартибга мувофиқ, ОТМларда контракт миқдори бир талабани ўқитиш билан боғлиқ харажатлар миқдоридан келиб чиқиб белгиланади.
Харажатлар таркибининг асосий қисмини профессор-ўқитувчилар ва ходимларга тўланадиган иш ҳақи (ажратмаси билан) ва унга тенглаштирилган тўловлар, талабага ҳар ой тўлаб бориладиган стипендия тўловлари (стипендияли тўлов-контракт қиймати миқдорида), ўқув жараёнини ташкил этиш билан боғлиқ бўлган харажатлар ҳамда бошқа турдаги сақлаш харажатлари ташкил қилади.
Бугунги кунда республика ОТМларида таҳсил олаётган талабалар учун ижтимоий ҳимояланган тўлов-контракт миқдорлари амал қилмоқда.
«Шуни алоҳида таъкидлаш лозимки, бакалавриат таълим йўналишлари бўйича 2019/2020-ўқув йили учун тасдиқланган стипендиясиз базавий тўлов-контракт миқдорлари бир талабани бир йиллик ўқитиш харажатларини қисман, яъни ўртача 68 фоизини қопламоқда холос. Мазкур маблағлар профессор-ўқитувчи ва ходимларнинг меҳнатига ҳақ тўлаш билан боғлиқ харажатларни қисман қопламоқда. Қолган харажатлар ОТМнинг бошқа молиявий манбалари ҳисобидан амалга оширилмоқда», – дейилади вазирлик изоҳида.
Таъкидланишича, ОТМга юклатилган талабаларга билим бериш мажбуриятлари олий таълим давлат стандартлари асосида бажарилиб келинмоқда.
«Бугунги карантин кунларида ОТМлар профессор-ўқитувчи ва ходимларига ўз вақтида ойлик маошлари, таътил пуллари ва талабаларга стипендиялар мос равишда давлат бюджети ва ОТМларнинг контракт маблағлари ҳисобидан тўлаб берилмоқда. ОТМлар талабалари учун масофавий таълим бериш жорий этилгани муносабати билан уни ташкил этиш ва моддий-техник базасини яратишга ҳам ОТМлар томонидан қўшимча маблағ сарфланмоқда. Шу билан бирга, тўлов-контракт асосида ўқитиш қийматининг асосий қисмини ташкил этувчи иш ҳақи ва унга тенглаштирилган тўловлар харажатлари ўзгармайди.
Шунингдек, фақатгина коммунал хизматлардан карантин даврида фойдаланиш қисқариши ҳисобига қисман харажатлар камайса-да, базавий контракт қиймати ижтимоий миқдорда белгилангани инобатга олинмоқда», – дейилади хабарда.
ОТМлар ётоқхоналарида яшовчи талабалар ётоқхона учун ўқув йилида белгиланган тўловларни тўлиқ тўлаган бўлсалар, фойдаланилмай қолган ойларига тўланган маблағлари талабанинг ёзма мурожаатига асосан қайтариб берилади ёки унинг розилиги билан кейинги ўқув йилига ўтказиб ётоқхонада яшаши учун ҳисобланиши мумкин.
Эслатиб ўтамиз, Ўзбекистонда коронавирус инфекцияси тарқалишининг олдини олиш мақсадида 16 мартдан барча таълим муассасалари қатори ОТМларда ҳам ўқиш тўхтатилиб, таътил эълон қилинган, кейинчалик таълим масофавий шаклда тикланган эди.
Изоҳ (0)