Бугун,

  • USD 10940.05
  • RUB 182.26
  • EUR 11121.65

Ўзбекистонда туризмнинг тикланиши уч босқичда амалга оширилади. Бу ҳақда Туризмни ривожлантириш давлат қўмитаси раиси Азиз Абдуҳакимов «Тикланиш йўли» халқаро онлайн туризм конференциясида маълум қилди.

Фото: «Дарё»

Фото: «Дарё»

Биринчи босқичда 2020 йилнинг 1 июнидан Ўзбекистоннинг «яшил» ва «сариқ» тоифали карантин зоналарида ички туризм қайта тикланади. Шу санадан эътиборан кўрсатилган зоналарда тегишли ташкилотлар — туроператорлар, турагентликлар, жойлаштириш воситалари, маданият, маданий мерос объектлари санитария-гигиена қоидаларига қатъий риоя қилган ҳолда иш бошлаши мумкин.

Ўзбекистонда 63 фоиз туроператорлар ва 81 фоиз жойлаштириш воситалари (меҳмонхоналар, ҳостеллар) ўз фаолиятини тўхтатган, биринчи босқич ички туризм орқали уларнинг фаолиятини қайта тиклашга бағишланади. Шунингдек, халқаро туризмни тиклашга максимал тайёр бўлиш учун ушбу босқичда Uzbekistan. Safe travel Guaranteed хавфсизлик тизими жорий қилинади.

Иккинчи босқич қўшни мамлакатлар ва МДҲ давлатлари билан ташкиллаштирилган ҳудудий туризмни қайта тиклашдан иборат бўлади. Бунда туристик гуруҳларнинг бутун саёҳат давомида хавфсизлик, санитар-гигиеник талаблар ва ижтимоий масофа чораларига риоя қилиш масалаларини ишлаб чиқиш жуда муҳим, оператив реакция билдирувчи қўшма гуруҳни тузиш ҳам мақсадга мувофиқ.

«Шунингдек, биз бу ишни ҳудудлар бўйича ҳамкасбларимизга турли тематикадаги янги аралаш турларни ишлаб чиқиш билан ҳам уйғунлаштиришни таклиф этамиз: гастрономик турлар, витамин турлари, кўчманчилар турлари, мототурлар, палов турлари, археологик ҳамда сиз-у бизнинг туристик шаҳар ва марказларимиздан ўтувчи бошқа турлар.

Бундан ташқари, биз махсус Silk Road Project платформасини яратдик, унда нафақат Ипак йўли мамлакатлари туристик салоҳияти, балки истиқболли минтақавий турмаҳсулотлар ва маршрутлар ҳам тарғиб қилинади», — дейди Азиз Абдуҳакимов.

Учинчи босқичда Ўзбекистон секин-асталик билан ташқи туризмни тиклайди, бунда пандемия билан боғлиқ вазиятдан келиб чиқиб, фуқаролари Ўзбекистонга киришга рухсат этиладиган узоқ хорижий давлатлар рўйхати тузилади. Аксарият Европа ва Осиё мамлакатлари аста-секин коронавирус пандемияси инқирозидан чиқмоқда ва туристик бозорлар очилишига тайёрланмоқда.

«Шу муносабат билан биз бошқа мамлакатларда санитар-эпидемиологик хавфсизлик ҳамда касалликнинг янги ҳолатларининг олдини олиш нуқтаи назаридан қабул қилинаётган чора-тадбирларни чуқур таҳлил қилмоқдамиз. Бундай таҳлил якунларига кўра, Ўзбекистондга амалга ошириладиган халқаро рейсларни қайта тиклаш географиясига доир қарорлар қабул қилинади», — дейди Туризмни ривожлантириш давлат қўмитаси раиси.

Эслатиб ўтамиз, Ўзбекистонда 1 июндан бошлаб «сариқ» ва «яшил» ҳудудларда ички туризм ўз ишини қайта бошлайди. Шунингдек, Президент фармонига асосан, туризм соҳасини қўллаб-қувватлаш бўйича бир қатор имтиёз ва имкониятлар белгилаб берилди, туроператорлар ва жойлаштириш воситаларига фоизсиз ссудалар ажратилади.

Изоҳ
Асосий янгиликлар