Андижон вилоятида маст ҳолда тутинган ногирон ота-онасини шафқатсизларча ўлдирган фуқаро 21 йилга қамалди. Бу ҳақда «Дарё» мухбири Умиджон Мамарасулов хабар берди.
Маълум бўлишича, Избоскан туманидаги «Анорзор» маҳалласида яшовчи 32 ёшли фуқаро В.К. тутинган ота-онаси билан ёқтирган қизига уйлантирмагани учун доимий жанжаллашиб келган.
2019 йил 14 октябрь санасида соат 19:00 ларда маст ҳолда уйга қайтган В.К. ота-онасини дастлаб кетмон, болта ва белкуракнинг ёғоч сопи билан калтаклаган. Калтакланиш оқибатида аввал онаси, сўнгра отаси вафот этган.
Жиноят ишлари бўйича Андижон вилоят суди раиси катта ёрдамчиси Комроншоҳ Расуловнинг маълум қилишича, мазкур жиноят иши 2020 йил 25 май куни судья Улуғбек Каримов раислигида кўриб чиқилган.
Судда аниқланишича, ота-онаси қотилига айланган В.К. шу ёшга киргунга қадар уч нафар аёл билан никоҳдан ўтган бўлса-да, ҳеч бири билан узоқ яшамаган. Шунингдек, тайинли ишнинг этагини тутмаган фуқаро ота-онасининг нафақасига кун кўриб келган.
«Воқеа юз берган куни мардикорлик қилиб топган 200 минг сўм пулимга спиртли ичимлик сотиб олиб, роса ичдим ва маст бўлиб қолдим. Кечга яқин уйга қандай келганимни эслай олмайман. Орада уйдагилар билан бироз жанжал кўтарилганини эслайман. Ундан кейин нима бўлганини билмайман. Ўзимга келганимда ота-онамнинг қотилига айланганимни тушундим», — деди В.К..
Суд В.К.ни Жиноят кодексининг 97-моддаси 2-қисми «а», «в», «ж» бандлари (икки ёки ундан ортиқ ожиз аҳволдаги шахсни шафқатсизлик билан қасддан ўлдириш) билан айбли деб топиб, унга 21 йил озодликдан маҳрум қилиш жазосини тайинлаган.
Изоҳ (0)