Кечга бориб ҳолсизланиш, чарчоқни ҳис қилиш табиий ҳолат, лекин лоҳаслик куннинг биринчи қисми ёки тонгдан безовта қилса, бу бежизга бўлмайди. Кун бошланишидаёқ чарчоқни ҳис қилиш сабаби нимадалиги ва бундай ҳолатда нима қилиниши кераклигига тўхталамиз.

Фото: Valley Sleep Center

B12 етишмаслиги

Сурункали чарчоқ ҳис қилиш сабабларидан бири муҳим озуқа моддаларининг етишмаслиги ҳисобланади. Шифокорларнинг фикрича, B12 витамини етишмовчилиги доимий апатияни (лоқайдлик, ҳафсаласизлик, қизиқишнинг йўқолиши) келтириб чиқаради. B12 асаб тизим, ҳужайралар метаболизмида аҳамиятли саналади. Организмга ушбу витамин етишмаслиги, депрессияга мойиллик ва ҳушдан кетиш каби симптомлар билан намоён бўладиган анемияни (камқонлик) ҳам келтириб чиқаради.

Нима қилиш керак?

Дарҳол дорихонадан витамин харид қилишга ошиқманг, рационингизда балиқ ва гўштли маҳсулотлар бўлишига эътибор беринг. Аммо юқоридаги симптомлар яққол сезилса ва ўзингизни ёмон ҳис қилаётган бўлсангиз, шифокор кўригидан ўтишни унутманг.

D витамин етишмаслиги

D витамин, юрак фаолияти, асаб тизими ва қон босимининг меъёрда бўлишида муҳим рол ўйнайдиган витаминлардан бири ҳисобланади. Шунингдек, иммунитетнинг юқори бўлишида ҳамда вирус ва бактерияларга қарши курашишда ҳам самараси катта. Ушбу витамин етишмаслиги нафас йўллари касалликлар, хусусан, шамоллаш ва пневмонияга олиб келади.

Нима қилиш керак?

Кунига камида бир соат, кўча ёки ҳовлида қуёш нурларидан баҳра олинг. Балиқ, тухум, жигар каби маҳсулотларни ейишни канда қилманг.

Овқатланиш

Инсон ўзини қандай ҳис қилишида у истеъмол қилаётган маҳсулотлар, уларнинг ошириб юборилиши ёки меъёрдан кам экани муҳим аҳамият касб этади. Кўпинча қаҳвани куннинг иккинчи ярмида истеъмол қилинса, уйқусизлик ёки асабийлашиш каби ҳолатлар кузатилади.

Нима қилиш керак?

Кунингизни тартибли режалаштиринг. Тонгда энергия билан таъминловчи маҳсулотлар — тухум, олма ёки сули ёрмасидан тайёрланган бўтқа истеъмол қилинг. Бажариладиган ишларни куннинг биринчи ярмида бажаринг, кечқурун витаминларга бой салат ёки шўрва тановул қилинг, уйқу соатингиз 7-8 соатдан кам бўлмаслигига ҳам эътибор қаратинг.

Фото: Modena Hair Institute

Аллергия

Аксарият одамларнинг фикрича, аллергия фақат аксириш, бурун оқиши ва қичиш билан намоён бўлади. Аслида эса аллергияга чалинган инсонларда кислород етишмаслиги оқибатида организмдаги барча аъзолар азият чекади.

Нима қилиш керак?

Хонани тез-тез чанглардан тозалаб артиб туриш, ҳавони янгилаш керак. Энг асосийси эса енгил қарамаслик ва аллергик симптомлар кузатилиши билан шифокор билан маслаҳатлашиш керак бўлади.

Депрессия

Ҳар доим ҳам яхши кайфиятда бўлиш иложсиз. Лекин депрессия ва кайфиятсизликнинг фарқи бор. Узоқ вақт тушкунликда бўлиш, апатия ва инсон тинкаси қуришига сабаб бўлади. Чунки руҳиятнинг саломатликда ўрни беқиёс.

Нима қилиш керак?

Жиддий йўқотишлар ёки ҳаётий зарбаларга учраган одам тушкун кайфиятдан чиқиши учун шифокор ва яқинлари кўмаги зарур бўлади. Шунингдек, овқатланиш ва атроф-муҳитнинг ҳам таъсири катта эканлигини унутмаслик керак.

Ичак-ҳазм фаолиятининг бузилиши

Ичакларда кўп миқдорда иммун ҳужайралари жойлашгани сабаб ҳам инсон саломатлиги ва ўзини қандай ҳис қилиши, ичаклар фаолияти қандайлиги билан бевосита боғлиқ бўлади .

Нима қилиш керак?

Шифокорга учраш ва қон таҳлили топшириш керак. Ичаклар микрофлораси тикланиши учун парҳезга риоя қилиш ва зарарли одатлардан воз кечиш керак бўлади.