Тошкент шаҳар Юнусобод туманидаги дўконда савдо қилувчи фуқаро ва унинг турмуш ўртоғида 1 июнь куни коронавирус тасдиқлангани ҳақида хабар берилган эди.
Санитария-эпидемиология назорати давлат инспекцияси бош инспектори Нурмат Отабеков 3 июнь куни бўлиб ўтган брифингда мазкур дўконнинг айнан қаерда жойлашганига аниқлик киритмади.
Нурмат Отабековга «Мен Юнусобод туманида яшайман. Шу туманда дўкон эгасида коронавирус аниқланганини эшитдим. Айнан қайси даҳа ва қайси дўконда аниқлангани тўғрисида батафсил маълумот бера оласизми?» деган савол берилди.
Бош санитария инспектори эса «Юнусобод туманидаги дўконда вирус аниқланганлиги уйдан чиқишда эҳтиёт чораларини кўриш учун етарли, деб ўйлаймиз», дея саволга жавоб қайтарди.
Эслатиб ўтамиз, Юнусободдаги мазкур дўкон сотувчисининг касаллиги 1 июнда тасдиқланган «Ўрикзор» бозоридаги сотувчи билан мулоқотда бўлган ва ундан маҳсулотлар сотиб олган. Шунингдек, «Ўрикзор»даги мазкур сотувчининг қизида ҳам коронавирус аниқланган.
Соғлиқни сақлаш вазирлиги 23 май куни бозорлар ходимларини оммавий тестдан ўтказиш жараёнида Тошкентдаги «Ўрикзор» бозоридаги сотувчиларнинг бирида коронавирус аниқланганини маълум қилган эди. Шундан сўнг, бозор вақтинчалик ёпилганди. Кейинроқ мазкур сотувчининг фарзандларида ҳам коронавирус аниқланди.
Изоҳ (0)